Россияда оммавий муштлашувда иштирок этган 100 дан ортиқ Ўзбекистон ва Тожикистон фуқаролари депортация қилинади

2022 йилнинг апрель бошларида Москвада ўзбекистонлик ва тожикистонлик мигрантлар ўртасида оммавий муштлашув юз бергани тўғрисида хабар берилганди. «Gazeta.ru»нинг Троиский судига таяниб маълум қилишича, мазкур муштлашувда иштирок этган юздан ортиқ Ўзбекистон ва Тожикистон фуқаролари Россиядан депортация қилинади.

Суд маълумотларига кўра, мигрантларни Хорижий фуқароларни вақтинча сақлаш марказига жойлаштириш бўйича 107 та қарор қабул қилинган. Фуқаролар у ерда 90 кун бўлади ва шундан сўнг Россиядан депортация қилинади.

Оммавий муштлашув 2022 йилнинг 1 апрель куни корхонада ишловчи икки ходим ўртасида ўзаро келишмовчилик (бири иккинчисини «аҳмоқ» дея ҳақорат қилган) оқибатида юз берган ва кейинчалик унга икки томондан ҳам ишчилар аралашиб кетган. Можародан сўнг жанжал иштирокчилари маъмурий жавобгарликка тортилган, полиция эса уларнинг мамлакатда қолиш муддатини қисқартириш ва депортация қилишга қарор қилган.

Бундан олдин Москвадаги оммавий муштлашувда қатнашган муҳожирларнинг 46 нафари Россиядан депортация қилингани, Россиянинг Приморск ўлкасида иш берувчи томонидан паспортлари олиб қўйилган ўзбекистонликларга ёрдам берилгани, Ташқи меҳнат миграцияси агентлиги Москвадаги оммавий муштлашувлар бўйича Россиядаги ўзбекистонликларга мурожаат билан чиққани тўғрисида хабар берилганди.