O‘zbekistondagi 10 ta OTM xalqaro reytingda reporter maqomiga ega bo‘ldi

Buyuk Britaniyaning nufuzli reyting tashkiloti – Times Higher Education Osiyodagi universitetlarni tadqiqot, ta’lim sifati kabi mezonlar bo‘yicha baholovchi Asia University Rankings-2022 xalqaro reytingi natijalarini e’lon qildi.

Reytingdan O‘zbekistondagi 10 ta oliy ta’lim muassasasi reporter sifatida o‘rin olgan:

• O‘zbekiston Milliy universiteti;
• Toshkent davlat yuridik universiteti;
• Toshkent pediatriya tibbiyot instituti;
• Toshkent shahridagi Turin politexnika universiteti;
• Urganch davlat universiteti;
• Toshkent moliya instituti;
• “Toshkent irrigatsiya va qishloq xo‘jaligi mexanizatsiyalash muhandislari instituti” MTU;
• Toshkent tibbiyot akademiyasi;
• Toshkent davlat iqtisodiyot universiteti;
• Toshkent farmatsevtika instituti.

Ushbu reyting dunyo bo‘yicha har yili Osiyo davlatlaridagi universitetlarni tadqiqot, ta’lim sifati, xalqaro xilma-xillik, iqtiboslik va sanoat daromadi (bilimlar almashish) bo‘yicha baholaydi. Ro‘yxatdan o‘rin egallagan 10 ta oliy ta’lim muassasasi The World University Rankings’ning nufuzli reytinglariga kirish uchun nomzod sifatida tan olinib, mazkur yo‘nalishda reyting agentligi ularga yaqindan yordam beradi.

Ma’lumot uchun, 2022-yil ushbu reytingda 829 ta universitet qayd etilib, ular orasida 625 ta o‘rin va 200 dan ortiq universitetlar reporter, ya’ni da’vogar universitetlar nominatsiyasiga ega bo‘ldi.

Avvalroq O‘zbekistondagi 30 ta OTM The Impact Rankings 2022 xalqaro reytingiga kiritilgani to‘g‘risida xabar berilgandi.

Eslatib o‘tamiz, 2019-yilning oktabrida prezident Shavkat Mirziyoyev 2030-yilgacha oliy ta’lim tizimini rivojlantirish konsepsiyasini tasdiqlovchi qarorga imzo chekkan edi. Unga ko‘ra, O‘zbekiston Milliy universiteti va Samarqand davlat universitetini ilg‘or universitetlarga aylantirish va ulardagi ta’lim darajasini dunyoning 500 ta eng yaxshi universitetlari qatoriga qo‘shish rejalashtirilgan.