Жаҳон банки Ўзбекистонга ҳукуматнинг молия секторини ислоҳ қилиш бўйича лойиҳани молиялаштирадиган 15 млн долларлик имтиёзли кредит беради. Бу ҳақда банк матбуот хизмати хабар берди.
Бу орқали давлат банкларини таркибий ўзгартириш ва хусусийлаштириш, табиий офатларга молиявий тайёргарликни кучайтириш, маҳаллий корхоналар учун экспорт ва савдони молиялаштириш амалга оширилади.
Мамлакат бозор иқтисодиётига ўтаётган бир пайтда банк ва суғурта соҳалари бир қатор жиддий ва ўзаро боғлиқ муаммоларга дуч келмоқда.
Банк сектори 33 та банкдан иборат бўлиб, 12 та давлат-тижорат банклари (ДТБ) устунлик қилади, улар 2021 йил якунига кўра иқтисодиётга ажратилган кредитларнинг 86 фоизини ташкил қилган.
2018 йилдан сўнг хусусий сектор кредитларнинг тез ўсиши туфайли молиялаштириш имкониятларини яхшилашдан фойда кўрган.
Бироқ банклар инновацион жиҳатдан чеклангани сабабли кичик ва ўрта корхоналар ҳали ҳам молиявий маҳсулотларнинг тегишли ассортименти ва сифатига эга эмас.
Мамлакат маҳаллий ва экспортчи фирмаларни молиялаштириш, кафолатлар ва суғурта қўллаб-қувватлашини таъминлайдиган Тараққиёт банкини ташкил этишга қарор қилди.
Лойиҳа Молия вазирлиги томонидан амалга оширилади, унга ДТБларни таркибий ўзгартириш ва хусусийлаштиришга раҳбарлик қилиш вазифаси юкланади.
Банк, суғурта, экспорт ва табиий офатлар хавфини молиялаштириш соҳасидаги ислоҳотлар молиявий хизматлар самарадорлигини оширишга имкон беради, — деди Жаҳон банкининг Ўзбекистондаги ваколатхонаси раҳбари Марко Мантованелли.Унга кўра, янги лойиҳа 2020—2025 йилларда банк секторини ислоҳ қилиш стратегиясини амалга оширишга хизмат қилади.
Бу давлатнинг ДТБларда бевосита иштирокини камайтиришга ва хусусий сектор банклари томонидан бошқариладиган янада самарали, инклюзив ва рақобатбардош банк тизимини қуришга ёрдам беради.
Аввалроқ Ўзбекистон банкларида муаммоли кредитлар кескин кўпайгани ҳақида хабар берилган эди.
Изоҳ (0)