Ўзбекистонда сотувчилардан катта миқдорда Қуръони карим ва жойнамозлар олиб, пулини бермай алдаб келган шахс 6 йилга қамалди

Фуқароларнинг ишончига кириб, Қуръон китоблари ва жойнамозларини фирибгарлик йўли билан қўлга киритган шахсга суд ҳукми ўқилди. Бу ҳақда Олий суд ахборот хизмати хабар қилди.

Қайд этилишича, Ш.Б. исмли фуқаро 2021 йил 18 январь куни С.М. Қуръони карим китобини 500 доллардан сотаётганидан хабар топиб, унга қўнғироқ қилган. Шу китоблардан 20 дона кераклигини, агар юборса, пулини бериб юборишини айтиб алдаган. Китобларни қўлга киритиб, бошқа шахсга сотиб юборган.

Бундан ташқари, у 9 февраль куни З.А. исмли фуқаро ҳам Қуръони карим китоблари ва жойнамозлар сотишидан хабар топиб, унинг ҳам ишончига кирган. Китобларни жўнаца, пулини бериб юбориши ҳақида айтиб, жами 17 миллион 565 минг сўмлик китобларни алдов йўли билан қўлга киритиб, бегона шахсларга сотиб юборган.

Худди шундай ҳолат 19 февраль куни ҳам содир бўлган. Ш.Б. А.А. ушбу фуқаронинг ишончига кириб, Қуръони карим китобларини сотиб олмоқчи эканини айтган. Юқоридаги гаплар билан алдаб, 25 дона жами 8 миллион 250 минг сўмлик китобларни алдов йўли билан қўлга киритиб, номаълум шахсларга сотиб юборган.

Шундан сўнг у 10 март куни М.Х. Telegram мессенжери орқали жойнамозлар савдоси билан шуғулланишидан хабар топиб, унинг ҳам ишончига кириб алдаган. Жойнамозларни юборса, пулини бериб юбориши ҳақида айтиб, 25 дона жами 8,5 миллион сўмлик жойнамозларни алдов йўли билан қўлга киритиб, терговда аниқлашни имкони бўлмаган шахсларга китоб ва жойнамозларни сотиб юборган.

Ш.Б. 1 апрель куни яна юқоридаги жиноятларга ўхшаш фирибгарлик жиноятини содир қилган.

Ҳолат юзасидан Ш.Б.га нисбатан жиноят ишлари бўйича Фарғона шаҳар судининг ҳукми билан 6 йил озодликдан маҳрум қилиш жазоси тайинланган. Унинг қилмишидан пушаймон бўлиб, қарамоғида бир нафар фарзанди ва кекса онаси борлигини инобатга олиб, суддан енгиллик беришни сўраб ёзган апелляция шикояти қаноатлантирилмаган.