Бухоро шаҳрида бўлиб ўтаётган камбағалликни қисқартириш халқаро форуми доирасида 26 май куни Ўзбекистон Метан эмиссиясини камайтириш бўйича глобал мажбурият дастурига қўшилди. Бу ҳақда «Дарё» мухбири хабар бермоқда.
Бош вазир ўринбосари — Иқтисодий тараққиёт ва камбағалликни қисқартириш вазири Жамшид Қўчқоров метан эмиссияларининг иқлимга таъсирини ҳисобга олган ҳолда глобал мажбурият тўғрисидаги ташаббусга қўшилиш муҳимлигини қайд этди.
«Мазкур ташаббусдан кўзланган мақсадларга эришиш учун мамлакатимизда халқаро ҳамкорлар билан биргаликда энергетика, қаттиқ маиший чиқиндилар ва агробизнес тармоқларига эътибор қаратилиб, комплекс чора-тадбирлар амалга оширилиши зарур», —деди Жамшид Қўчқоров.
Европа тикланиш ва тараққиёт банки (EТТБ) президенти Одиль Рено-Бассонинг айтишича, Ўзбекистонда метан эмиссияларига қарши мақсадли кураш икки томонлама таъсирга эга. Бу — иқлим бўйича Париж битимига мувофиқ, иқтисодий ва экологик фойда олиш имконияти йўлидаги муҳим қадамдир.
«Ўзбекистон учун иссиқхона газлари эмиссияларини камайтириш ва миллий миқёсда белгиланган кўрсаткичига эришиш имконияти юқори ҳисобланади. Шундай экан, бизнинг техник ва молиявий кўмагимиз Ўзбекистонга 2030 йилгача эмиссияларни самарали камайтиришга ёрдам беради, деб ўйлайман», — деди Одиль Рено-Бассо.
Европа Иттифоқининг Ўзбекистондаги элчиси Шарлотта Адрианнинг таъкидлашича, метан атмосферада карбонат ангидриддан кейин энг кўп тарқалган иккинчи модда бўлиб, иқлим исишига катта таъсир кўрсатади.
«Афсуски, метан ҳажми сезиларли даражада ошиб боряпти. Ўзбекистоннинг глобал метан мажбуриятига қўшилиши зарур эди. Ўзбекистон иссиқхона газлари ва метан эмиссияларини 30 фоизгача тушириш бўйича мажбуриятлар олган. Буни амалга оширишда биргаликда ишлаймиз ва яқиндан кўмаклашамиз», — деди Шарлотта Адриан.
Маълум қилинишича, Ўзбекистон 2030 йилгача метан чиқиндиларини 30 фоизга камайтиришга қаратилган Метан бўйича глобал мажбуриятда (GMP) иштирок этаётган ва Марказий Осиё минтақасида мазкур келишувга қўшилган иккинчи мамлакат бўлди.
Изоҳ (0)