Kambag‘allikni qisqartirishning eng yaxshi yo‘li – iqtisodiy o‘sishdir. Bu haqda iqtisodchi Behzod Hoshimov UzReport-TV telekanaliga bergan intervyusida aytib o‘tdi.
Buxoro shahrida 26—27-may kunlari O‘zbekistonda kambag‘allikni qisqartirish masalasida xalqaro forum o‘tkazilmoqda. Tadbirda ishtirok etayotgan iqtisodchi Behzod Hoshimov kambag‘allik muammosini yechishning bir necha choralarini aytdi.
“O‘zbekistonda kambag‘allik muammosini hal qilish uchun lokal yechim qilmoqchi bo‘lsak, eng yaxshi yo‘l – naqd pul berish. Ya’ni insonlar o‘zlari pulni nimaga, qanday ishlatishni hukumat va hokimiyat a’zolaridan yaxshi biladi. Pul berilsa, ular xohlasa dori oladi, xohlasa non yoki kiyim sotib oladi. Bu eng samarador yo‘llardan biri. Kambag‘allikka qarshi global yechim esa doimiy iqtisodiy o‘sishdir. Iqtisodiy o‘sish bo‘lmaguncha O‘zbekiston yoki boshqa ixtiyoriy davlat va jamiyatda kambag‘allik masalasi yechilmaydi. Kambag‘allikni qisqartirish so‘zi bilan iqtisodiy o‘sish so‘zi bir-biriga teng tushunchalardir. Resurslarimiz qanchalik ko‘p bo‘lsa, zaif qatlamga yordam berishga imkoniyatlarimiz shuncha yuqori bo‘ladi”, – dedi mutaxassis.
Behzod Hoshimovning ta’kidlashicha, mamlakatda kambag‘allikni markazlashgan emas, mahalliy darajada yechish kerak.
“Biz markazsizlanish haqida o‘ylashimiz kerak. Ya’ni asosiy fiskal va pul qarorlari joylarda hal bo‘lishi lozim. Chunki o‘sha hudud aholisi qayerga pul sarflashni markazdan ko‘ra yaxshiroq biladi. Hududiy taraqqiyotning asosiy g‘oyasi shundaki, biz imkoniyatlar va resurslarni joylarga berishimiz kerak. Aholisini kambag‘allikdan chiqarishda insoniyat tarixidagi eng yaxshi tajriba Xitoyda bo‘lgan. Mamlakat nihoyatda kabag‘al edi. Lekin hozirga kelib, Xitoyda 100 millionlab insonlar kambag‘allikdan chiqib ketdi. Bunga sabab, Xitoyning iqtisodiy taraqqiyoti bo‘ldi. Boshqa Osiyo davlatlari bor, masalan, Vyetnam. Ularda ham iqtisodiy o‘sish orqali bu muammo hal bo‘ldi. O‘ylashimcha, keyingi navbatda Hindiston turibdi. Kelasi 30 yilda mamlakatda qariyb 600 million kishi kambag‘allikdan chiqib ketadi”, – dedi iqtisodchi.
Behzod Hoshimovning qo‘shimcha qilishicha, yaxshi ish o‘rinlarining yaratilishi ham iqtisodiy o‘sish natijasida yuzaga keladi.
“O‘ylaymanki, O‘zbekistondagi iqtisodiy rivojlanish qanchalik tez bo‘lsa, mahalliy mehnat bozorida shunchalik talab oshadi. To‘g‘ri, odamlarni ish bilan ta’minlash kambag‘allikni kamaytiradi. Lekin ishi bor insonlarning kambag‘allari ham mavjud. Ya’ni ertalabdan kechgacha ishlab kosasi oqarmaydigan insonlar ham bor. Albatta, bundaylar boshqa davlatlarda ham bor. Ular “working poor” (ishlab turgan kambag‘allar) deyiladi. Aytmoqchimanki, ishning o‘zi yechim emas. Ishli bo‘lsa-yu kam pul olsa, kambag‘allik yechilmaydi. Odam yaxshi daromad oladigan va o‘zini rivojlantiradigan ishlar kerak. Boylik kambag‘allik muammosini yechishning eng asosiy omilidir”, – dedi Behzod Hoshimov.
Avvalroq Buxoroda O‘zbekiston kambag‘allikni qisqartirish xalqaro forumi boshlangani xabar qilingandi. Tadbirda iqtisodiy taraqqiyot va kambag‘allikni qisqartirish vaziri Jamshid Qo‘chqorov nutq so‘zlab, mamlakatda 2026-yilga qadar kambag‘allikni 2 baravarga qisqartirish maqsad qilinganini ta’kidlagan.
Izoh (0)