Конституцияга ўзгартириш ва киритиш юзасидан иккита ҳолатда юборилган таклифлар қабул қилинмайди. Бу ҳақда «Юксалиш» умуммиллий ҳаракати раиси, Олий Мажлис депутати Бобур Бекмуродов оммавий ахборот воситалари вакиллари билан суҳбатда айтиб ўтди, деб хабар бермоқда «Дарё» мухбири.
Бобур Бекмуродовнинг айтишича, бугунги кунгача Конституцияни ўзгартириш бўйича мулк ҳуқуқи, фуқароларнинг экологик ҳуқуқлари билан боғлиқ таклифлар келиб тушган.
«Уларнинг айримлари бугун мисол сифатида эълон қилинди. Комиссиянинг кейинги йиғилишида аниқ таклифлар муҳокама қилинади. Юборилган ҳар бир таклиф 20 кун муддатда кўриб чиқилади», — дейди у.
«Юксалиш» умуммиллий ҳаракати раиси иккита ҳолатда юборилган таклифлар қабул қилинмаслигини айтди.
«Биринчиси, Конституциявий ислоҳотлар билан боғлиқ бўлмаган таклифлар бўлса улар ҳам кўриб чиқилади, лекин комиссия кўриб чиқиш учун киритилмайди, тегишли бошқа органларга юборамиз. Иккинчиси, белгиланган муддатдан кеч юборилган мурожаатлар ҳам кўриб чиқилмайди. Бошқа барча ҳолатларда у хоҳ таҳририй ўзгариш бўлса, хоҳ муносабат бўлсин ёки конкрет конструктив таклифлар бўлса уларнинг барчаси кўриб чиқилади», — дея қўшимча қилади Бобур Бекмуродов.
Эслатиб ўтамиз, 20 май куни Ўзбекистон Конституциясига ўзгартириш киритиш ва ташкилий чора-тадбирларни амалга ошириш юзасидан Конституциявий комиссия тузилиб, унинг таркиби ва вазифалари белгиланганди.
26 май куни Конституциявий комиссиянинг дастлабки йиғилишида фуқароларнинг таклифлари билан ишлаш механизми маълум қилинди.
Мавзуга доир:
- «Ижтимоий тармоқларда кўпчилик нима учун Конституциявий ислоҳот керак, деган нарсага тушунмаётганига гувоҳ бўлиш мумкин» — Акмал Саидов
- «Ҳозир бутун дунёда Конституциявий ислоҳотлар шарпаси кезиб юрибди» — Акмал Саидов
- «Ҳеч бир қонун Конституцияга зид бўлмаслигини таъминлаб беришимиз керак» – Акмал Саидов
Изоҳ (0)