Apple компанияси янги авлод смартфонларининг фронтал камералари учун юқори сифатли компонентлардан фойдаланмоқчи ва шу сабабли етказиб беришдаги шерик сифатида LG Иннотек компаниясини кўриб чиқяпти, деб хабар беради GSMArena.
Миш-мишлар рост бўлса, бу iPhone’нинг фронтал камераси Жанубий Корея компанияси томонидан яратилган тарихдаги биринчи ҳолат бўлади.
Манбага кўра, даставвал LG Иннотек ихтироларидан iPhone 15 смартфонларида фойдаланилиши режалаштирилган, бироқ Apple шошилинчда жадвалга ўзгартириш киритган. Бу компания Хитойда ишлаб чиқарилган камералар сифатини текширишда дуч келган айрим сифат муаммоларига боғлиқ. Шу сабабли Apple номи ошкор этилмаган Хитой компанияси билан ҳамкорликдан бош тортган, LG Иннотек камералари эса iPhone 14 моделларига ўрнатилади.
2022 йилнинг кузида тақдим этилиши кутилаётган iPhone қурилмалари фронтал камера ёрдамида тасвирга олиш вақтида автофокусни қўллаб-қувватлаши кутилмоқда. Бу бошқа функцияларнинг яхшиланиши билан бир қаторда, янги қурилмалардаги фронтал камера нархи олдинги моделлар билан таққослаганда уч баробарга қимматлашишидан далолат беради.
Аввалроқ iPhone 14 линейкасидан ўрин оладиган смартфонларнинг тахминий нархлари эълон қилингани, Plus моделлари қайтиши мумкинлиги тўғрисида хабар берилганди.
Изоҳ (0)