Apple kompaniyasi yangi avlod smartfonlarining frontal kameralari uchun yuqori sifatli komponentlardan foydalanmoqchi va shu sababli yetkazib berishdagi sherik sifatida LG Innotek kompaniyasini ko‘rib chiqyapti, deb xabar beradi GSMArena.
Mish-mishlar rost bo‘lsa, bu iPhone’ning frontal kamerasi Janubiy Koreya kompaniyasi tomonidan yaratilgan tarixdagi birinchi holat bo‘ladi.
Manbaga ko‘ra, dastavval LG Innotek ixtirolaridan iPhone 15 smartfonlarida foydalanilishi rejalashtirilgan, biroq Apple shoshilinchda jadvalga o‘zgartirish kiritgan. Bu kompaniya Xitoyda ishlab chiqarilgan kameralar sifatini tekshirishda duch kelgan ayrim sifat muammolariga bog‘liq. Shu sababli Apple nomi oshkor etilmagan Xitoy kompaniyasi bilan hamkorlikdan bosh tortgan, LG Innotek kameralari esa iPhone 14 modellariga o‘rnatiladi.
2022-yilning kuzida taqdim etilishi kutilayotgan iPhone qurilmalari frontal kamera yordamida tasvirga olish vaqtida avtofokusni qo‘llab-quvvatlashi kutilmoqda. Bu boshqa funksiyalarning yaxshilanishi bilan bir qatorda, yangi qurilmalardagi frontal kamera narxi oldingi modellar bilan taqqoslaganda uch barobarga qimmatlashishidan dalolat beradi.
Avvalroq iPhone 14 lineykasidan o‘rin oladigan smartfonlarning taxminiy narxlari e’lon qilingani, Plus modellari qaytishi mumkinligi to‘g‘risida xabar berilgandi.
Izoh (0)