iPhone 14 линейкаси ҳали тақдим этилмаган бўлса-да, Apple ишқибозлари янги қурилмадан ҳозирданоқ ҳайратга тушишни бошлади. YouTube’даги Unbox Therapy ники остидаги блогер ўзининг каналида Японияда ясалган iPhone 14 Pro Max макетини намойиш этди.
Бир қарашда макет жуда iPhone 13 Pro Max’га ўхшаб кетади. Яхшилаб эътибор билан қаралсагина, икки авлод ўртасидаги фарқни англаш мумкин.
Видео муаллифининг таъкидлашича, янги модель бироз қалинроқ ишланган. Камералар блоки эса сезиларли даражада бўртиб чиққан, қурилманинг ўзи эса бироз оғир. Ўчириб-ёқиш ва овоз баландлигини бошқариш тугмаси ўзидан олдинги авлодникидан каттароқ. Дисплей четлари ингичка кўринишда. Макетнинг ён четларидаги антенна чизиқлари кўзга ташланмайди.
«Моноқош»дан зерикканлар учун ажойиб янгилик. Одатдаги қирқимдан воз кечилган: унинг ўрнига модель «ҳапдори + дирокол» кўринишидаги қирқимга эга бўлади.
USB-C разъёмини эса яна кутишга тўғри келади. Макетдан кўриш мумкинки, iPhone 14 линейкаси ҳам Lightning порти билан жиҳозланади.
Аввалроқ iPhone 14 линейкасидан ўрин оладиган смартфонларнинг тахминий нархлари эълон қилингани, Plus моделлари қайтиши мумкинлиги тўғрисида хабар берилганди.
Изоҳ (0)