Сурхондарё вилоятининг Денов туманида 20 сотих ерни бир неча фуқарога сотиб, уларни 220 миллион сўмга чув туширган шахсга жиноят иши қўзғатилди. Бу ҳақда вилояти ИИБ ахборот хизмати хабар берди.
Маълум қилинишича, Денов туманида 2022 йил 16 апрель куни Сариосиё туманида яшовчи А.С. вилоят ИИБнинг 102 хизматига мурожаат қилган. Унинг сўзларига кўра, Денов туманида яшовчи, Б.С. 2020 йил февраль ойида шу туманда яшовчи Т.К. ва М.О.га туманнинг «Намозгоҳ» маҳалласи ҳудудидаги янги қурилган деҳқон бозори атрофидаги 20 сотих ерни кўрсатиб, ушбу ерни сотишини айтиб, улар билан 220 миллион сўмга келган.
У фуқаро А.С.дан 75 миллион сўм, Т.К.дан 70 миллион сўм ва М.О.дан 75 миллион сўм жами 220 миллион сўм пулларни олиб, ушбу ерни шу кунга қадар ҳужжатлаштириб бермасдан пулларни ўзлаштириб кетган.
10 май куни Б.С.га нисбатан Жиноят кодексининг 168-моддаси (фирибгарлик) 4-қисми «а» банди билан жиноят иши қўзғатилган.
Аввалроқ Андижонда сотиш тақиқланган ерни 9 минг долларга сотиб юбормоқчи бўлган шахс ушлангани, Самарқандда фуқарога сувли ер майдонини танишлари орқали 25 минг долларга сотмоқчи бўлган шахс қўлга олингани тўғрисида хабар берилганди.
Изоҳ (0)