Шавкат Мирзиёев 23 май куни спорт соҳасидаги ишлар бўйича ўтказилган йиғилишда спортчиларни танлаш бўйича янгича тизим жорий этилиши маълум қилди. Бу ҳақда президент матбуот котиби хабар қилди.
Йиғилишда Сидней ва Рио Олимпиадаларида яхши натижа қайд этган Андижон, Бухоро ва Фарғона бокс мактаблари бугунги кунга келиб натижа кўрсатмай қўйгани таъкидланган. Ўтган йили 352 та республика мусобақаси ўтказилган. Аммо бирорта ҳудудда туман босқичи, 158 тасида эса вилоят босқичи ташкил этилмаган.
«Спорт вазирлигини янгидан ташкил этиб, вазир ва ўринбосарларига аниқ вазифаларни қўйганман. Энди спортчиларни тайёрлаш ва селексия қилиш бўйича мутлақо янги тизим жорий қилинади", — деган президент.
Энг аввало ёшларни болаликданоқ спортга жалб қилиш ва иқтидорли спортчиларни тайёрлаш борасидаги ёндашувлар ўзгартирилади.
Янги тизим Бухоро вилояти мисолида тушунтирилган. Жумладан:
- ҳар бир маҳаллада иккита мавсумда (апрель—июнь, сентябрь—декабрь) мусобақалар ташкил этилиб, яхши натижа кўрсатган ёшлар спорт бўлими ва ёшлар етакчиси томонидан электрон рўйхатга киритилади;
- бу ёшлар вилоятдаги 19 та спорт мактабининг махсус гуруҳларида (8 ойгача) мураббийлар билан бепул шуғулланади;
- махсус гуруҳлардаги профессионал спортга салоҳияти бор ёшлар йўналишига кўра вилоятдаги 4 та ихтисослашган мактабга қабул қилинади (сузиш, яккакураш, ўйин турлари ва енгил атлетика, бадиий гимнастика);
- спорт мактаби тренерларининг иш ҳақи 35 фоизга оширилади. Бундан ташқари, яхши натижа кўрсатган мактаб директорлари, тренерлар ва бошқа мутахассисларга қўшимча 50 фоизгача устама тўланади;
- жамоавий спорт турлари бўйича ҳудудий чемпионатларда спортчилари ғолиб бўлган тренерларга 5 фоиз, республика чемпионатида 20 фоиз устама берилади;
- вилоятдаги спорт мактаблари ихтисослигига қараб олимпия спорт турлари бўйича базага айлантирилади.
Изоҳ (0)