Футбол – йилдан йилга ўзгараётган, такомиллашиб бораётган, миллионлар эмас, балки миллиардлар ўйинига айланаётган спорт тури. Интернет нашрлар ривожланиб, янгиликлар турли тармоқларда узатилишидан аввал барча соҳаларга қатори футболга оид янгиликлар ҳам инсонларга телевидение, радио ва газета-журналлар орқали етказиб берилган.
Хўш, 11 йил аввал ўзбек футбол газеталари нималар ҳақида ёзган, мулоҳазалар қилган, кимлар билан интервьюлар уюштирган? Буларнинг барчаси «Ўзбек футболи газеталари тарихи» рукнида эълон қилиб борилади.
Ўзбекистон терма жамоаси 1 ва 4 июнь кунлари Украина ва Хитойга қарши ўртоқлик учрашувларига тайёргарлик кўрмоқда. «Интерфутбол» газетасида термага чақирилган футболчиларнинг рўйхати эълон қилинган.
Вадим Абрамов легионер футболчилар хизматидан атиги битта ўйинда фойдаланиши мумкин. Бунга сабаб – футболчилари иштирок этадиган чемпионатдаги тақвим зичлиги. Хусусан, Жанубий Кореянинг Кей-Лигасида тўп сурадиган уч нафар футболчи Украинага қарши ўйинда иштирок эта олмайди. Россиянинг биринчи дивизионида ўйнайдиган Марат Бикмаев ва Украинада ҳаракат қиладиган Максим Шацких эса Хитойга қарши ўйинда терма жамоага ёрдам беролмайди. Бикмаев биргина ўйин учун клубидан рухсат сўраган бўлса, Шацкихнинг Хитойга бормаслиги сабаби бошқа футболчиларни синаб кўрилиши билан изоҳланган.
Дарвоқе, май ойининг охирида тўйи бўлиши лозим бўлган Виталий Денисов ҳам ушбу учрашувларда иштирок эта олмайди.
25 майдан 8 июнга қадар Ўзбекистон олимпия терма жамоаси Австриядаги турнирда иштирок этади. Олимпия терма жамоаси турнир давомида Нидерландия, Исроил ва Албания термаларига қарши баҳс олиб бориши лозим. Эътиборга молик томони шундаки миллий терма жамоа билан бирдек ОТЖнинг бош мураббийи – Вадим Абрамов.
Ушбу турнир учун ҳам футболчилар чақирув олган. Абрамов «Бунёдкор»нинг 20 ёшли посбони Виктор Мачаловни ҳам ОТЖга илк бор таклиф қилган.
Қизиқ томони шундаки, Вадим Карленович 1 ва 4 июнь кунлари миллий терма жамоа билан икки мамлакатда, 25 майдан 8 июнгача ОТЖ билан яна бир мамлакатда бўлишга тўғри келади. Абрамов қайси терма жамоага қачон улгуради, деган саволга унинг ўзи берган интервьюсида жавоб берибди:
ФИФА рейтингида Ўзбекистон яна 83-ўринда. Терма жамоа ҳисобидаги очколар йиғиндиси 403 га тенг. ЖЧ—2010 ғолиби бўлган Испания эса рейтингда пешқадам.
Ҳозирда ҳолат қандай? ФИФАнинг 2022 йил 31 март куни эълон қилган рейтингига кўра, Ўзбекистон 1286 очко билан яна 83-ўринда. Рейтингда эса пешқадам 1832 очко билан Бразилия терма жамоаси.
Биз ҳам энтикиб, ҳам хўрсиниб эслайдиганимиз – Мексикада бўлиб ўтган ўсмирлар ўртасидаги Жаҳон чемпионатига қуръа ташланган. Чорак финалга қадар етиб борган Ўзбекистон терма жамоаси вакилларига қайтиши биланоқ Spark автомашинаси берилган, футболчилари ўзбек футболининг келажаги, деб қаралган эди.
Орадан вақт ўтиб уларнинг қанчаси футболда қолди-ю, қанчасининг фаолияти қандай бўлганини кўриб, билиб олдик.
Ўзбекистон ўсмирлар терма жамоаси бош мураббийи Алексей Евстафеев «Футбол-Экспресс»га берган интервьюсида қуръа ҳақида фикр билдириб, жумладан, шундай деган: «Гуруҳимизда Чехия фаворит бўлса керак. Айнан чехларни жиддий рақиб деб ҳисоблайман. Қолган жамоалар ҳақида ҳозирча ҳеч нарса дея олмайман. Чунки рақибларимиз тўғрисида менда етарли маълумотлар йўқ. Мана энди Жаҳон чемпионати бошлангунига қадар рақибларимизни яхшилаб ўрганиб борамиз».
«Клубларимиз жарима тўлашади» сарлавҳаси остидаги хабарда айтилишича, Ўзбекистоннинг тўрт клуби – «Пахтакор», «Бунёдкор», «Насаф» ва «Шўртан» биттадан учрашувда ўйин дискини ОФК қароргоҳига юбормагани учун 5000 доллардан жаримага тортилган. Жарималарнинг умумий миқдори эса 286 минг доллар.
Навоийнинг «Қизилқум»ида 8 ўйин ва мураббий истеъфоси юз берган. Жамоадан кетган Марат Кабаев қандай қилиб мураббий бўлгани-ю, қандай қилиб кетгани, жамоада содир бўлган мавсумолди ажойиботлар ҳақида хабарнинг ўзида аниқ-тиниқ айтилган:
Футбол афсонаси Пеледан эътиборга молик фикр: «Мухлислар футболчиларни солиштиришни яхши кўришади. Лекин улар ҳамиша Кройфф, Платини ва Ди Стефаноларни унутиб қўядилар. Ушбу футболчилар ҳозирги Мессидан анча кучли бўлишган».
«Футбол-Экспресс» газетасида чиққан «8-турдан сўнг савол» сарлавҳали мақолада Ўзбекистон чемпионатининг 8-туридан кейин 8 та савол келтирилган. Улардан эътиборлиси – мухлисларнинг ташрифи билан боғлиқ.
Айтиш лозимки, орадан 11 йил вақт ўтди ва бу савол ҳамон ўз актуаллигини йўқотмаган.
«Африка Блаттер учун овоз беради» сарлавҳали хабарда айтилишича, 1 июнь куни бўлиб ўтадиган ФИФА президентлиги сайловида Африка футбол конфедерацияси Зепп Блаттерни қўллаб-қувватлайди.
Аввалроқ, Англия футбол ассоциациясининг Блаттерга ҳам, ОФК президенти Муҳаммад бин Ҳаммамга ҳам сайловларда овоз бермаслиги, шунингдек, Океания Футбол Конфедерацияси сайловда Блаттерни қўллаб-қувватлашга қарор қилгани ҳақида ёзган эдик.
«Барселона»нинг энг оғир босиқ бўлган ярим ҳимоячиси Серхио Бускетс Марселога нисбатан ирқчилик қилгани учун сал қолса ЕЧЛ финалидан қуруқ қолиб кетиши мумкин эди. Аммо УЕФА ижроия қўмитаси испаниялик футболчининг айбини исботлайдиган далиллар топа олмаган.
Европа Лигасида «Порту» чемпион! Радамель Фалькао финалда гол уриб, жамоасининг ғалабасини таъминлаган, шунингдек, турнир тўпурари ҳам бўлган.
Изоҳ (0)