Канада Хитойнинг Huawei ва ZTE телекоммуникация компанияларининг маҳсулот ва хизматларини мамлакатда тақиқламоқда, деди Инновациялар, фан ва саноат вазири Француа-Филипп Шампан.
Аввал Оттава Huawei компаниясига миллий 5G алоқа тармоғини яратишда иштирок этишни тақиқлаши ҳақида хабар берилган.
«Канада ҳукумати телекоммуникация инфратузилмамизнинг узоқ муддатли хавфсизлигини таъминламоқда. Ушбу режа доирасида ҳукумат Huawei ҳамда ZTE маҳсулот ва хизматларини мамлакат телекоммуникация тизимларига киритишни тақиқлайди», — дейилади хабарда.
Шампаннинг айтишича, ҳукуматнинг тақиқ тўғрисидаги қарори мустақил хавфсизлик агентликлари томонидан синчковлик билан текширув ва Канаданинг энг яқин иттифоқчилари билан маслаҳатлашувлардан сўнг қабул қилинган.
Баёнотга кўра, Канададаги Huawei ва ZTE ускуналаридан фойдаланаётган компаниялар улардан воз кечиши шарт бўлади.
Канада жосуслик хавфи туфайли Huawei компаниясининг миллий 5G тармоқларига киришини тақиқлаш ёки чеклаш бўйича Five eyes разведка альянсидаги (АҚШ, Буюк Британия, Канада, Австралия, Янги Зеландия разведка хизматларини бирлаштирган) бешинчи ва сўнгги давлатга айланди.
Изоҳ (0)