Коррупцияга қарши курашиш агентлиги 2022 йил 1-чораги якунларига кўра, маҳаллий бюджет даромадлар режасининг режадан орттириб бажарилган қисми ва мазкур маблағлар йўналтирилган мақсадлар тўғрисидаги маълумотларнинг очиқланиш ҳолатини ўрганди. Бу ҳақда агентлик матбуот хизмати хабар берди.
Ўрганишлар натижасида Жиззах, Сурхондарё, Сирдарё, Фарғона ва Тошкент вилояти ҳокимликларининг расмий веб-сайтларида ушбу маълумотлар ўз вақтида эълон қилиб борилаётгани, Қорақалпоғистон Республикаси Вазирлар Кенгаши, Қашқадарё, Навоий, Самарқанд, Наманган, Хоразм вилояти ҳокимликлари томонидан эса қисман очиқлангани аниқланган.
Андижон вилоят ҳокимлиги расмий веб-сайтида бундай маълумотлар сўнгги бор 2021 йил 1-чораги ҳолатига жойлаштирилган, Тошкент шаҳар ҳокимлиги томонидан умуман очиқланмаган.
«Давлат органлари ва ташкилотларининг фаолияти очиқлигини таъминлаш, шунингдек, жамоатчилик назоратини самарали амалга оширишга доир қўшимча чора-тадбирлар тўғрисида»ги президент фармони талаблари тўлиқ ижро этилиши таъминланган Тошкент вилояти ҳокимлигида 2022 йил бошида шаклланган эркин қолдиқ маблағлари ҳамда шу йилнинг 1-чораги давомида маҳаллий бюджет даромадлар режасининг ошириб бажарилган қисми ҳисобидан ажратилган маблағлар жами 231,3 миллиард сўмни ташкил этган. Улар вилоят ҳокимининг фармойишига асосан қуйидагича тақсимланган:
- ҳудуднинг ижтимоий-иқтисодий ривожлантириш дастурлари учун 82,3 миллиард сўм;
- марказлашган жамғармаларга 31,9 миллиард сўм;
- «Фуқаролар ташаббуси» (openbudget) 27,3 миллиард сўм;
- обод қишлоқ ва обод маҳалла дастури доирасида 16,9 миллиард сўм;
- бюджет ташкилотларининг моддий базасини мустаҳкамлаш ва хўжалик харажатлари учун 16 миллиард сўм;
- ободонлаштириш харажатларига 9,3 миллиард сўм;
- маданий-спорт тадбирлар, фестиваллар, умумхалқ ва миллий байрамлари учун 5,4 миллиард сўм;
- бошқа харажатлар учун 11,8 миллиард сўм.
- ҳудудларни ижтимоий-иқтисодий ривожлантириш дастурлари ва ижтимоий соҳа муассасаларини қуриш, таъмирлаш ва жиҳозлаш ишлари учун 11,5 миллиард сўм;
- ҳарбий маъмурий секторга юклатилган вазифалар ижросини таъминлаш учун 8,5 миллиард сўм;
- «Фуқаролар ташаббуси» жамғармасига 5,7 миллиард сўм;
- «Ёшлар дафтари» жамғармасига 2,8 миллиард сўм;
- умумхалқ байрамлари, спорт ва маданий тадбирлар ўтказиш билан боғлиқ харажатлар учун 2,4 миллиард сўм;
- «Аёллар дафтари» жамғармасига 1,9 миллиард сўм;
- «Саховат ва кўмак» жамғармасига 1,9 миллиард сўм;
- «Обод қишлоқ» ва «Обод маҳалла» дастурлари учун 1 миллиард сўм.
Агентлик томонидан мониторинг натижасида аниқланган хато ва камчиликларни бартараф этиш ҳамда келгусида очиқликка оид қонунчилик ҳужжатларида белгиланган талабларга қатъий риоя этилишини назоратга олиш бўйича 8 та маҳаллий ҳокимликка огоҳлантириш юборилган.
Бундан ташқари, Президенти Администрацияси ва Вазирлар Маҳкамасига аниқланган ҳолатлар юзасидан тегишли маълумот киритилган.
Эслатиб ўтамиз, февраль ўрталарида Ўзбекистонда вазирлик, қўмита ва вилоят ҳокимликларининг очиқлик индекси бўйича рейтинги эълон қилинганди. Маҳаллий давлат ҳокимияти органлари орасида Самарқанд вилояти биринчи (83,83 балл) ўринни олган. Иккинчи бўлиб Наманган вилояти (79,32 балл), учинчи ўринда Хоразм вилояти (72,38 балл) қайд этилган.
Изоҳ (0)