Тошкентда академик, тарих фанлари доктори, «Ўзбекистон маданий мероси жаҳон тўпламларида» лойиҳасининг илмий раҳбари Эдвард Ртвеладзе таваллудининг 80 йиллигига бағишланган хотира кечаси бўлиб ўтди. Бу ҳақда «Дарё» мухбири хабар бермоқда.
Тадбир Ўзбекистон маданий меросини асраш, ўрганиш ва тарғиб қилиш бўйича Бутунжаҳон жамияти, Фанлар академияси, Туризм ва маданий мерос вазирлиги томонидан ташкил этилди.
Эдвард Ртвеладзе Марказий Осиё минтақаси тарихи ва маданияти қатламлари, Буюк Ипак йўлининг эски ва янги йўлларини тадқиқ этган. Ўзбекистонда ва хорижда чоп этилган 800 дан ортиқ илмий мақолаларга муаллифлик қилган.
Олим Марказий Осиё ва Шимолий Кавказда 100 дан ортиқ археологик экспедицияларда қатнашганди. 1990 йиллар охирида Тохаристон археологик экспедициясини тузиб, қадимий Кампиртепа манзилгоҳида тадқиқотларни қайта тиклаган, бу ерда Марказий Осиё археологик амалиётида биринчи марта аҳоли пунктининг тўлиқ очилиши амалга оширилган, унинг жойлашуви ва Кушонлар даврига оид шаҳар тузилмаси аниқланганди.
Эдвард Ртвеладзенинг охирги энг машҳур археологик кашфиётлардан бири милоддан аввалги IV охирида асос солинган Окс Александрияси бўлди. Қадимий шаҳар милодий I аср бошларигача ҳозирги Сурхондарё ҳудудида жойлашганди.
Умрининг сўнгги йилларида Ртвеладзе «Ўзбекистон маданий мероси жаҳон тўпламларида» лойиҳасининг илмий раҳбари вазифасини бажарди. Унинг раҳбарлигида «Ўзбекистон маданий мероси жаҳон тўпламларида» туркумига оид 50 та китоб-альбом нашр этилди. Олим 2022 йил февраль ойида 80 ёшида вафот этди.
Кечада Ўзбекистон маданий меросини асраш, ўрганиш ва тарғиб қилиш бўйича бутунжаҳон жамияти раиси Фирдавс Абдухолиқов «Эдвард Ртвеладзе хотираси» номли китобнинг дастлабки пилот нашрини тақдим этди. Китоб олимнинг ҳамкасблари, дўстлари, оила аъзолари ва яқинлари томонидан ёзилган 50 дан ортиқ мақолани ўз ичига олган.
Тадбирда Олий Мажлис Сенати раисининг биринчи ўринбосари Содиқ Сафоев, «Ўзбекистон маданий мероси жаҳон тўпламларида» лойиҳаси таҳририят кенгаши раиси, академик Акмал Саидов, Ўзбекистон Республикаси Бош вазирининг ўринбосари Азиз Абдуҳакимов, Грузиянинг Ўзбекистондаги Фавқулодда ва мухтор элчиси Зураб Абдушелишвили иштирок этди ва сўзга чиқди.
Изоҳ (0)