Uzbekistan Airways компанияси Тошкентдан Бухорога «Илк парвозим» ижтимоий лойиҳасини амалга оширди. Парвоз йўловчилари эса «темир дафтар»га киритилган 15 нафар аёл бўлди, дея хабар бермоқда «Дарё» мухбири.
Компания ахборот хизмати раҳбари Камола Икромованинг «Дарё»га маълум қилишича, компания бир неча ой илгари «Илк парвозим» ижтимоий лойиҳасини йўлга қўйган бўлиб, 2022 йилнинг 17 май куни лойиҳа асосида 15 нафар хотин-қизни Бухорога саёҳатга олиб борган.
«Инсон ҳаёт синовларидан чарчаб, орзуларининг ушалишига ишонмай қолганида кутилмаганда мўъжиза юз беришини хаёлига ҳам келтирмайди. Ваҳоланки, ҳаёт инсонга кутилмаган туҳфаларни ҳадя этиши мумкин. Лойиҳа амалга оширилгунча жуда кўп сонли ижтимоий ҳимояга муҳтож ва кам таъминланган оила бекалари билан суҳбатда бўлдик. Уларнинг орзулари, ўй-хаёллари билан қизиқдик. Ишонасизми, кўпчилигида бир хил орзу — самолётда парвоз қилиш иштиёқи бор экан. Бу кимларгадир эриш туюлар, аммо уларнинг орзуларини амалга оширишни компаниямиз раҳбарияти ҳам қўллаб-қувватлади. Онахон, опахонларнинг кўзларидаги қувонч-у, шодликка ҳеч нарса тенг бўлолмас экан. Уларга бир кун бўлса-да, шундай қувонч бағишлай олганимиздан ўзимиз ҳам хурсандмиз», —дейди Камола Икромова.
«Дарё» мухбири саёҳатчи аёллар билан суҳбатда бўлди.
«Икки нафар фарзандим бор. Уларни улғайтириш, вояга етказиш, ҳаётга тайёрлаш билан умр ўтди. Аммо бирор маротаба саёҳатга чиқмаган эканман. Биласиз, саёҳатга чиқиш учун ҳам иқтисодий шароит керак, истаймизми-йўқми, ҳамма нарса пулга бориб тақалади. Шароитсизлик сабаб умрнинг яримини яшаб бўлдим. Ишонасизми, мен умрим давомида ҳатто поездга ҳам чиқмаганман. Самолётда учиш орзуси эса аллақачон болаликдаги хомхаёлларга айланиб бўлганди. Одам осмонга чиқса, ердагилар чумолидек бўлиб кўринса керак-а, дея дугоналар бир-биримизга берган саволларимиз ҳалигача хаёлларимизда яшаб келган. Бир куни қўнғироқ бўлди ва самолётга учишни истайсизми, дея савол беришди. Ҳаяжондан ўзимни боладек ҳис қилиб, самолётга учишни орзу қилмаган бола борми, дебман. Аввалига кимдир ҳазиллашяптимикан, деб ўйладим. Йўқ, Uzbekistan Airways компаниясига раҳмат. Орадан қирқ йиллардан кўпроқ вақт ўтиб, болаликдаги орзуларимизга ошно этди. Жудаям хурсандмиз», — дейди ташкилотчиларга ўз миннатдорлигини билдирган Рашаной Баймакова.
Ўн йил илгари турмушга чиққан Ҳалима Умарова ҳам уй ва оила ташвишлари билан бўлиб, бирор маротаба саёҳатга чиқмаганини бугун эса эътибордан мамнун эканини билдирди.
Саёҳатчи аёллар Бухоро шаҳрининг қадим обидалари, улуғ қадамжолари ҳамда зиёратгоҳларида бўлди.
«Ўйламаган ва хаёлимизга келмаган ишлар бўлди-да. Орзулар қанотида парвоз қилдик. Кўз очиб юмгунча қадим шаҳарга саёҳатга келдик. Бухорони суратларда кўрганман, телевизорда томоша қилганман. Ўзимни худди эртаклар оламида юргандек ҳис қиляпман. Эшитишимча, Бухорои шарифнинг қайси манзилида туриб бўлса ҳам ният қилсанг, амалга ошаркан. Шу муқаддас заминда туриб, Умра зиёратига ҳам боришлик насиб этишини ният қилдим», — дейди 67 ёшли онахон қувонч ёшларини яширолмай.
Билдирилишича, Uzbekistan Airways компаниясининг «Илк парвозим» ижтимоий лойиҳаси бундан илгари Хоразм вилоятига икки кунлик саёҳат билан бошланган бўлиб, бу саёҳатда ҳам аёлларнинг йўл, яшаш ва овқатланиш харажатлари компания томонидан тўлиқ қоплаб берилган.
«Илк парвозим» ижтимоий лойиҳаси аёллар орзуларини рўёбга чиқаришда давом этади. Лойиҳадан кўзланган мақсад битта, у ҳам бўлса, кемтик кўнгилли онахон, опахонларимизга бир лаҳза бўлса-да ҳаётдан баҳрамандлик ва хурсандчилик улаша олиш. Ўзлари айтишганидек, болаликдаги самолётда парвоз қилишдек беғубор орзуларини амалга ошириш», — дейди Камола Икромова.
Изоҳ (0)