Тошкентдаги гўзаллик салони 9 млрд сўм қарзи билан аукционга қўйилди

Тошкент шаҳар Юнусобод тумани Марказ-4 мавзесида жойлашган гўзаллик салони кимошди савдосига қўйилди. Лот маълумотлари «E-auksion» порталида эълон қилинган.

Ер участкасининг умумий майдони — 0,003 гектар. Бинонинг майдони — 151 квадрат метр. Гўзаллик салонида газ, сув, электр таъминоти ва канализация тизими мавжуд. 

Аукционга қўйилган салоннинг бошланғич баҳоси — 3,88 млрд сўм. Аризалар 10 июнь 09:00 га қадар қабул қилинади. Савдолар худди шу куни 10:00 да бошланади.

Лот изоҳида ёзилишича салон аукционга «Асакабанк»нинг Муаммоли активлар билан ишлаш департаменти томонидан қўйилган.

Ушбу мулк харидор томонидан «Асакабанк»ка 9,2 млрд сўм миқдоридаги қўшимча ишлаб чиқариш суммасини тўлаб бериш шарти билан аукцион савдоларига чиқарилмоқда. 

Мулк ҳуқуқи олди-сотди дастурий воситалар тўлиқ назоратидан сўнг ҳамда 9,2 млрд сўм миқдоридаги суммаси тўлангандан сўнг сотиб олувчи номига расмийлаштириб берилади.

Объект ускуналари, инвентар ва жиҳозларсиз аукцион савдоларига чиқарилган.

Аввалроқ Тошкентда фуқаролар яшовчи ҳовли МИБ томонидан 2,6 млрд сўмга аукционга қўйилгани ҳақида хабар берилган эди.