Филиппин диктатори Фердинанд Маркоснинг ўғли кичик Фердинанд Маркос мамлакат президентлиги сайловларида етакчилик қилмоқда. Бу ҳақда сайловлардаги овозларнинг дастлабки норасмий ҳисоб-китобига таяниб, Reuters хабар тарқатган.
Сайлов бюллетенларининг учдан икки қисми ҳисоб-китоб қилинганида кичик Маркос энг яқин таъқибчиси, амалдаги вице-президент Лени Робредодан икки баравар кўпроқ овоз олган. BBC нашрининг ёзишича, сайловларда қайд этилган расмий натижалар бир неча кун ичида эълон қилиниши мумкин.
Бонгбанг Маркос амалдаги президент Родриго Дутерте партиясидан номзодини қўйган. Дутерте гиёҳванд моддалар савдосига қарши курашда минглаб одамларни суд ҳукмисиз ўлдиришни буюргани билан дунёга танилган. Дутертенинг қизи Маркос билан жуфтлик бўлиб, вице-президент сифатида сайловларда ўз номзодини қўйган.
64 ёшли Маркос реал сиёсий платформага эга эмас, бироқ унинг президентлик даври амалдаги, шафқатсиз «кучли қўл» сиёсати билан ҳокимиятни бўйсундирган давлат раҳбари Родриго Дутерте ҳукмронлигининг мантиқий давоми бўлиши кутилмоқда.
Фердинанд Маркос 1965 – 1986 йилларда Филиппин президенти бўлган. У давлат раҳбари бўлган даврнинг аксар қисми фавқулодда ҳолат режими остида кечган: Катта Маркос ҳукмронлиги вақтида ҳуқуқ ҳимоячилари ва мухолифатчилар ўғирлаб кетилгани, қийноққа солингани, Маркослар оиласининг эса давлат ғазнасидан миллиардлаб долларларни ўғирлагани тахмин қилинади.
Изоҳ (0)