Diktator Ferdinandning o‘g‘li Filippindagi prezidentlik saylovlarida yetakchilik qilmoqda
Filippin diktatori Ferdinand Markosning o‘g‘li kichik Ferdinand Markos mamlakat prezidentligi saylovlarida yetakchilik qilmoqda. Bu haqda saylovlardagi ovozlarning dastlabki norasmiy hisob-kitobiga tayanib, Reuters xabar tarqatgan.
Saylov byulletenlarining uchdan ikki qismi hisob-kitob qilinganida kichik Markos eng yaqin ta’qibchisi, amaldagi vitse-prezident Leni Robredodan ikki baravar ko‘proq ovoz olgan. BBC nashrining yozishicha, saylovlarda qayd etilgan rasmiy natijalar bir necha kun ichida e’lon qilinishi mumkin.
Bongbang Markos amaldagi prezident Rodrigo Duterte partiyasidan nomzodini qo‘ygan. Duterte giyohvand moddalar savdosiga qarshi kurashda minglab odamlarni sud hukmisiz o‘ldirishni buyurgani bilan dunyoga tanilgan. Dutertening qizi Markos bilan juftlik bo‘lib, vitse-prezident sifatida saylovlarda o‘z nomzodini qo‘ygan.
64 yoshli Markos real siyosiy platformaga ega emas, biroq uning prezidentlik davri amaldagi, shafqatsiz “kuchli qo‘l” siyosati bilan hokimiyatni bo‘ysundirgan davlat rahbari Rodrigo Duterte hukmronligining mantiqiy davomi bo‘lishi kutilmoqda.
Ferdinand Markos 1965 – 1986-yillarda Filippin prezidenti bo‘lgan. U davlat rahbari bo‘lgan davrning aksar qismi favqulodda holat rejimi ostida kechgan: Katta Markos hukmronligi vaqtida huquq himoyachilari va muxolifatchilar o‘g‘irlab ketilgani, qiynoqqa solingani, Markoslar oilasining esa davlat g‘aznasidan milliardlab dollarlarni o‘g‘irlagani taxmin qilinadi.
