Европа Иттифоқининг Ўзбекистондаги делегацияси Инвестициялар ва ташқи савдо вазирлиги билан ҳамкорликда Европа Иттифоқига аъзо бир қатор давлатлар делегацияларининг Қорақалпоғистонга, Оролбўйи минтақасига расмий ташрифини ташкил қилди. Бу ҳақда ИTCВ матбуот хизмати хабар берди.
Европа Иттифоқи Ўзбекистон президенти ташаббуси билан ташкил қилинган БМТнинг Оролбўйи минтақаси учун Инсон хавфсизлиги бўйича кўпшериклик Trast жамғармаси фаолияти доирасидаги экологик ва ижтимоий аҳамиятга молик лойиҳаларни қўллаб-қувватлашда Ўзбекистоннинг яқин ҳамкоридир.
Маълум қилинишича, ҳозирги кунда Европа Иттифоқи томонидан жамғармага 5 миллион евро миқдорида молиявий ёрдам кўрсатилган. Финляндия ва Норвегия ҳам ҳар бири 1 миллион евродан ўз ҳиссаларини қўшган. Бундан ташқари, Европа инвестиция банки ва Kreditanstalt für Wiederaufbau (KfW, Германия) томонидан 125 миллион евро ва 31,5 миллион евро миқдорида аралаш молиялаштириш шаклида молиявий ресурслар ажратилган.
БМТнинг Оролбўйи минтақаси учун Инсон хавфсизлиги бўйича кўпшериклик Trast жамғармаси объектларига ташриф чоғида иштирокчилар маҳаллий аҳолини ичимлик суви, соғлиқни сақлаш хизматлари билан таъминлаш, шунингдек, тадбиркорликни қўллаб-қувватлаш бўйича лойиҳаларнинг амалга оширилиши билан танишдилар, минтақага инвестицияларни янада кириб келишининг аҳамияти ва жамғарма фаолиятини янада кенгайтириш истиқболларини муҳокама қилган.
Инвестициялар ва ташқи савдо вазирлиги томонидан ҳудуднинг ижтимоий-иқтисодий ривожланишини ҳар томонлама рағбатлантиришга қаратилган қиймати 210 миллион доллардан ортиқ бўлган истиқболли дастур ва лойиҳалар тақдим қилинган. Томонлар ушбу лойиҳаларни амалга оширишнинг амалий жиҳатларини муҳокама қилиб, уларни илгари суриш бўйича навбатдаги тадбирларни белгилаб олган.
«Европа Иттифоқи БМТнинг Оролбўйи минтақаси учун Инсон хавфсизлиги бўйича кўпшериклик Trast жамғармасига 5 миллион евродан ортиқ маблағ ажратди ва бу билан табиий офатнинг салбий оқибатларини юмшатиш бўйича юқори даражадаги содиқлигини таъкидлади. Айни пайтда Инвестициялар ва ташқи савдо вазирлиги билан биргаликда Оролбўйи минтақасини ‘яшил ривожлантириш’ бўйича қиймати 150 миллион евродан ортиқ бўлган инвестициявий лойиҳа ишга туширилмоқда. Лойиҳа Оролбўйи минтақасида ўрмон, сув ва қишлоқ хўжалигини ривожлантириш ва ирригация тизимларини модернизация қилишни ўз ичига олади», — дейди Европа Иттифоқининг Ўзбекистондаги элчиси Шарлотта Адриан Қорақалпоғистонга ташрифи чоғида.
Унинг сўзларига кўра, Европа Иттифоқи Ўзбекистонга совға сифатида ҳамда мамлакат ҳукуматининг чўлланишга учраган ерларни тиклаш борасидаги саъй-ҳаракатларини қўллаб-қувватлаш мақсадида 2022 йил охиригача ЕИга аъзо 27 давлатлар номидан 27 мингта тўп дарахт экиш мажбуриятини ўзига олади.
Шунингдек, Қорақалпоғистонда делегация аъзолари Жўқорғи Кенгес раиси Мурат Камалов, Вазирлар Кенгаши, Қорақалпоғистон давлат университети раҳбарияти билан учрашган, вилоятнинг бой маданий мероси ва табиий объектлари билан ҳам танишган.
Ташриф натижасида Орол фожиаси оқибатларини юмшатишга қаратилган лойиҳавий ҳамкорликни янада ривожлантириш бўйича келишувларга эришилган.
Эслатиб ўтамиз, 2021 йилнинг ноябрида Шавкат Мирзиёев «Оролбўйи минтақасида тадбиркорликни жадал ривожлантиришга оид қўшимча чора-тадбирлар тўғрисида»ги фармонни имзолаганди.
Изоҳ (0)