Yevropa Ittifoqining O‘zbekistondagi delegatsiyasi Investitsiyalar va tashqi savdo vazirligi bilan hamkorlikda Yevropa Ittifoqiga a’zo bir qator davlatlar delegatsiyalarining Qoraqalpog‘istonga, Orolbo‘yi mintaqasiga rasmiy tashrifini tashkil qildi. Bu haqda ITSV matbuot xizmati xabar berdi.
Yevropa Ittifoqi O‘zbekiston prezidenti tashabbusi bilan tashkil qilingan BMTning Orolbo‘yi mintaqasi uchun Inson xavfsizligi bo‘yicha ko‘psheriklik Trast jamg‘armasi faoliyati doirasidagi ekologik va ijtimoiy ahamiyatga molik loyihalarni qo‘llab-quvvatlashda O‘zbekistonning yaqin hamkoridir.
Ma’lum qilinishicha, hozirgi kunda Yevropa Ittifoqi tomonidan jamg‘armaga 5 million yevro miqdorida moliyaviy yordam ko‘rsatilgan. Finlyandiya va Norvegiya ham har biri 1 million yevrodan o‘z hissalarini qo‘shgan. Bundan tashqari, Yevropa investitsiya banki va Kreditanstalt für Wiederaufbau (KfW, Germaniya) tomonidan 125 million yevro va 31,5 million yevro miqdorida aralash moliyalashtirish shaklida moliyaviy resurslar ajratilgan.
BMTning Orolbo‘yi mintaqasi uchun Inson xavfsizligi bo‘yicha ko‘psheriklik Trast jamg‘armasi obyektlariga tashrif chog‘ida ishtirokchilar mahalliy aholini ichimlik suvi, sog‘liqni saqlash xizmatlari bilan ta’minlash, shuningdek, tadbirkorlikni qo‘llab-quvvatlash bo‘yicha loyihalarning amalga oshirilishi bilan tanishdilar, mintaqaga investitsiyalarni yanada kirib kelishining ahamiyati va jamg‘arma faoliyatini yanada kengaytirish istiqbollarini muhokama qilgan.
Investitsiyalar va tashqi savdo vazirligi tomonidan hududning ijtimoiy-iqtisodiy rivojlanishini har tomonlama rag‘batlantirishga qaratilgan qiymati 210 million dollardan ortiq bo‘lgan istiqbolli dastur va loyihalar taqdim qilingan. Tomonlar ushbu loyihalarni amalga oshirishning amaliy jihatlarini muhokama qilib, ularni ilgari surish bo‘yicha navbatdagi tadbirlarni belgilab olgan.
“Yevropa Ittifoqi BMTning Orolbo‘yi mintaqasi uchun Inson xavfsizligi bo‘yicha ko‘psheriklik Trast jamg‘armasiga 5 million yevrodan ortiq mablag‘ ajratdi va bu bilan tabiiy ofatning salbiy oqibatlarini yumshatish bo‘yicha yuqori darajadagi sodiqligini ta’kidladi. Ayni paytda Investitsiyalar va tashqi savdo vazirligi bilan birgalikda Orolbo‘yi mintaqasini ‘yashil rivojlantirish’ bo‘yicha qiymati 150 million yevrodan ortiq bo‘lgan investitsiyaviy loyiha ishga tushirilmoqda. Loyiha Orolbo‘yi mintaqasida o‘rmon, suv va qishloq xo‘jaligini rivojlantirish va irrigatsiya tizimlarini modernizatsiya qilishni o‘z ichiga oladi”, — deydi Yevropa Ittifoqining O‘zbekistondagi elchisi Sharlotta Adrian Qoraqalpog‘istonga tashrifi chog‘ida.
Uning so‘zlariga ko‘ra, Yevropa Ittifoqi O‘zbekistonga sovg‘a sifatida hamda mamlakat hukumatining cho‘llanishga uchragan yerlarni tiklash borasidagi sa’y-harakatlarini qo‘llab-quvvatlash maqsadida 2022-yil oxirigacha YIga a’zo 27 davlatlar nomidan 27 mingta to‘p daraxt ekish majburiyatini o‘ziga oladi.
Shuningdek, Qoraqalpog‘istonda delegatsiya a’zolari Jo‘qorg‘i Kenges raisi Murat Kamalov, Vazirlar Kengashi, Qoraqalpog‘iston davlat universiteti rahbariyati bilan uchrashgan, viloyatning boy madaniy merosi va tabiiy obyektlari bilan ham tanishgan.
Tashrif natijasida Orol fojiasi oqibatlarini yumshatishga qaratilgan loyihaviy hamkorlikni yanada rivojlantirish bo‘yicha kelishuvlarga erishilgan.
Eslatib o‘tamiz, 2021-yilning noyabrida Shavkat Mirziyoyev “Orolbo‘yi mintaqasida tadbirkorlikni jadal rivojlantirishga oid qo‘shimcha chora-tadbirlar to‘g‘risida”gi farmonni imzolagandi.
Izoh (0)