Тошкент шаҳридаги кўп қаватли уйларнинг ҳолати тўғрисидаги барча маълумотлар умумлаштирилиб, эскирганлик даражаси аниқланади. Бу ҳақда шаҳар ҳокимлиги хабар қилди.
Қайд этилишича, шаҳарда турли йилларида қарийб 12 мингта кўп хонадонли уйлар қурилган бўлиб, улардан ҳар бири қандайдир эскирганлик даражасига эга. Тошкент шаҳар ҳокими ўринбосари вазифасини бажарувчи, Уй-жой коммунал хизмат кўрсатиш бош бошқармаси бошлиғи Шоҳруҳ Раҳимжонов ва шаҳар ҳокимининг ахборот технологияларини жорий этиш масалалари бўйича ўринбосари, Рақамли ривожланиш бошқармаси бошлиғи Алексей Хен биргаликда кўп қаватли турар жойларнинг ҳолатини инвентаризация қилиш ва баҳолаш учун ахборот тизимини яратиб, ишга туширган.
12 нафар коммунал инспектор кўп қаватли уйларни айланиб чиқиб, томлар, ертўлалар, фасадларни суратга олади. Сўнг кўплаб мезонлар бўйича махсус тузилган саволномани тўлдиради, ҳар бир ҳолатни беш балли тизимда баҳолайди.
Фотосуратларни жўнатиш ва саволномани тўлдиришдан олдин инспектор «Гармония» манзиллар реестрида бинони танлайди. GPS тизими инспекторнинг координаталарини аниқлайди ва уларни текширилаётган уйнинг координаталари билан таққослайди. Агар координаталар мос келса ва фотосуратнинг асллиги текширилиб, тўғри келса, инспекторнинг киритган маълумотлари тасдиқланади. Бевосита керакли манзилга бормасдан ва бинони кўздан кечирмасдан, бу ҳақда маълумот юбориш мумкин бўлмайди.
Инспектор уйнинг фасади, йўлаклари, рақами, ёритиш тизими, ноқонуний қурилмалар мавжудлиги ва бинонинг бошқа параметрларини ҳисобга олади. Администратор инспекторнинг барча маълумотларини текширади ва уларни тасдиқлайди ёки баъзи маълумотларга аниқлик киритишни сўрайди.
Тахминан уч ой ичида барча кўп қаватли уйларни ўрганишни якунлаш, маълумотларни умумлаштириш, уларни Тошкент шаҳри харитасига киритиш ва аниқланган камчиликларни долзарблигига кўра кучларни жамлаган ҳолда бартараф этиш бўйича оптимал режа ишлаб чиқиш режалаштирилган.
Эслатиб ўтамиз, Тошкент шаҳар ҳокимлиги ҳузуридаги Рақамли ривожланиш департаменти Age Tashkent лойиҳасини ишга туширган. Лойиҳа ёрдамида танланган вақт оралиғини ёки аниқ йилни қўллаган ҳолда Тошкентдаги биноларнинг ёшини аниқлаш имконияти мавжуд.
Тошкент шаҳар ҳокимлиги Сталин даврида қурилган Навоий, Нукус ва Шота Руставели кўчаларидаги 291 та бинонинг фасадини янгилаётгани хабар қилинганди. Уларнинг айримлари моддий маданий мерос объектлари реестрига киритилган.
Изоҳ (0)