Toshkent shahridagi ko‘p qavatli uylarning holati to‘g‘risidagi barcha ma’lumotlar umumlashtirilib, eskirganlik darajasi aniqlanadi. Bu haqda shahar hokimligi xabar qildi.
Qayd etilishicha, shaharda turli yillarida qariyb 12 mingta ko‘p xonadonli uylar qurilgan bo‘lib, ulardan har biri qandaydir eskirganlik darajasiga ega. Toshkent shahar hokimi o‘rinbosari vazifasini bajaruvchi, Uy-joy kommunal xizmat ko‘rsatish bosh boshqarmasi boshlig‘i Shohruh Rahimjonov va shahar hokimining axborot texnologiyalarini joriy etish masalalari bo‘yicha o‘rinbosari, Raqamli rivojlanish boshqarmasi boshlig‘i Aleksey Xen birgalikda ko‘p qavatli turar joylarning holatini inventarizatsiya qilish va baholash uchun axborot tizimini yaratib, ishga tushirgan.
12 nafar kommunal inspektor ko‘p qavatli uylarni aylanib chiqib, tomlar, yerto‘lalar, fasadlarni suratga oladi. So‘ng ko‘plab mezonlar bo‘yicha maxsus tuzilgan savolnomani to‘ldiradi, har bir holatni besh balli tizimda baholaydi.
Fotosuratlarni jo‘natish va savolnomani to‘ldirishdan oldin inspektor “Garmoniya” manzillar reyestrida binoni tanlaydi. GPS tizimi inspektorning koordinatalarini aniqlaydi va ularni tekshirilayotgan uyning koordinatalari bilan taqqoslaydi. Agar koordinatalar mos kelsa va fotosuratning aslligi tekshirilib, to‘g‘ri kelsa, inspektorning kiritgan ma’lumotlari tasdiqlanadi. Bevosita kerakli manzilga bormasdan va binoni ko‘zdan kechirmasdan, bu haqda ma’lumot yuborish mumkin bo‘lmaydi.
Inspektor uyning fasadi, yo‘laklari, raqami, yoritish tizimi, noqonuniy qurilmalar mavjudligi va binoning boshqa parametrlarini hisobga oladi. Administrator inspektorning barcha ma’lumotlarini tekshiradi va ularni tasdiqlaydi yoki ba’zi ma’lumotlarga aniqlik kiritishni so‘raydi.
Taxminan uch oy ichida barcha ko‘p qavatli uylarni o‘rganishni yakunlash, ma’lumotlarni umumlashtirish, ularni Toshkent shahri xaritasiga kiritish va aniqlangan kamchiliklarni dolzarbligiga ko‘ra kuchlarni jamlagan holda bartaraf etish bo‘yicha optimal reja ishlab chiqish rejalashtirilgan.
Eslatib o‘tamiz, Toshkent shahar hokimligi huzuridagi Raqamli rivojlanish departamenti Age Tashkent loyihasini ishga tushirgan. Loyiha yordamida tanlangan vaqt oralig‘ini yoki aniq yilni qo‘llagan holda Toshkentdagi binolarning yoshini aniqlash imkoniyati mavjud.
Toshkent shahar hokimligi Stalin davrida qurilgan Navoiy, Nukus va Shota Rustaveli ko‘chalaridagi 291 ta binoning fasadini yangilayotgani xabar qilingandi. Ularning ayrimlari moddiy madaniy meros obyektlari reyestriga kiritilgan.
Izoh (0)