Toshkent shahar hokimligi Navoiy, Nukus va Shota Rustaveli ko‘chalaridagi 291 ta binoning fasadini yangilamoqda. Ularning ayrimlari moddiy madaniy meros obyektlari reyestriga kiritilgan. Bu haqda poytaxt hokimining kommunal masalalar bo‘yicha o‘rinbosari vazifasini bajaruvchi Shohrux Rahimjonovga tayanib, “Gazeta.uz” xabar berdi. Loyiha Toshkent shahar hokimi Jahongir Ortiqxo‘jayevning topshirig‘iga asosan amalga oshirilmoqda.

Shohrux Rahimjonovning so‘zlariga ko‘ra, binolar fasadi ta’mirtalab ahvolga kelib qolgan. “Stalinka”larda savdo nuqtalari va ofislar ochishda alyukobond kabi zamonaviy materiallardan foydalanilgan. Bu binoning me’moriy ko‘rinishini buzgan, o‘zining arxitekturaviy ahamiyatini yo‘qotgan. “Qanday bo‘lganini arxivlar orqali ko‘rib, dastlabki ko‘rinishini qaytaryapmiz”, — deydi hokim o‘rinbosari.

Ma’lum qilinishicha, Navoiy ko‘chasidagi jami 82 ta, Nukus ko‘chasida — 113 ta va Shota Rustaveli ko‘chasida 96 ta binoning fasadi yangilanadi. Ta’mirlash ishlari shahar budjeti hisobidan amalga oshiriladi. Rahimjonovning ta’kidlashicha, fasadlarni bo‘yash ishlari uy-joy mulkdorlari shirkati tomonidan amalga oshirilishi kerak, biroq ularning ko‘pchiligi bunga qodir emasligi hisobga olinib, shahar barcha xarajatlarni zimmasiga olgan.

Shohrux Rahimjonovning aytishicha, konditsionerlar ham bitta qatorga joylashtirilgan, fasaddan simlar olib tashlangan, bo‘g‘otlar yangilangan. Devorlar gruntlangan, shtukaturka, shpaklyovka qilingan va yorqin sarg‘ish rangga bo‘yalgan. Boshqa binolarni ta’mirlashda ham xuddi shu prinsipdan foydalaniladi. Hokim o‘rinbosarining so‘zlariga ko‘ra, uylarning poydevor qismi granit bilan qoplangan, biroq aholining aytishicha, qoplash ishlari “marmarga o‘xshash” kafeldan qilingan.

O‘zbekiston Arxitektorlar ittifoqi raisi o‘rinbosari Asomiddin Tojiyevning ma’lum qilishicha, moddiy madaniy meros reyestriga Toshkentdagi Stalin davrida qurilgan 50—70 ta uy kiritilgan. Markaziy ko‘chalarda joylashgan barcha binolarning, shuningdek, madaniy meros obyektlarining bezash pasportlari bor bo‘lib, har qanday ta’mirlash va rekonstruksiya ishlari shunga ko‘ra amalga oshirilishi kerak. Uning so‘zlariga ko‘ra, Madaniyat vazirligi huzuridagi Madaniy meros departamenti ushbu ishlarni nazorat qilishi lozim.

Asomiddin Tojiyevning ta’kidlashicha, moddiy madaniy meroslar, jumladan, Navoiy, Nukus va Shota Rustaveli ko‘chalaridagi Stalin davrida qurilgan binolar bilan ishlaganda maksimal darajada me’moriy elementlarni saqlab qolish lozim. Karnizlarni almashtirish kerak emas. Oyna romlari restavratsiyaga javob bermagan taqdirda almashtirilishi lozim. Imkoni bo‘lsa, ularni aynan o‘sha materialdan tayyorlangan yangi romlarga yoki arxitektorlar tomonidan hisobga olingan ranglar palitrasi va shaklini hisobga olishi kerak.

Asomiddin Tojiyevning qo‘shimcha qilishicha, amalga oshiriladigan ishlar — bu rejaviy ta’mirlash. Uning so‘zlariga ko‘ra, fasadlar bo‘yalishga muhtoj. Oxirgi marta ular yetti yil oldin yangilangan. O‘tgan qish, kuchli muzlamalar va yog‘ingarchilikning ko‘pligi bo‘yoq va shtukaturkaning ko‘chishiga olib kelgan.

Shohrux Rahimjonovning ta’kidlashicha, Nukus, Navoiy va Shota Rustaveli ko‘chalaridagi ishlar yakunlangach, shahar boshqa ko‘chalardagi binolarning fasadini yangilashga kirishadi. Arxitektorlar ittifoqi raisi o‘rinbosari Asomiddin Tojiyevning aytishicha, ishlar yakunlangach, unga baho berish mumkin bo‘ladi. “Hozircha hech qanday qoidabuzarliklarni ko‘rmadik”, — deydi u.