Ўзбекистон футбол ассоциацияси томонидан 6 май, жума куни ЎФА мажлислар залида Италия чемпионати ва Ўзбекистон футболи афсоналари ўртасида ўтказиладиган ўртоқлик учрашувига бағишланган матбуот анжумани бўлиб ўтди. Бу ҳақида «Дарё» мухбири хабар бермоқда.
Анжуманда ЎФА биринчи вице-президенти Равшан Эрматов, BMB Trade Group компанияси Кузатув кенгаши раиси Бекзод Маматқулов ва Ўзбекистон Миллий медиа ассоциацияси бошқарув раиси Шерзодхон Қудратхўжа ва бошқалар иштирок этди.
Шунингдек, тадбирда онлайн-форматда Италиядан Ўзбекистоннинг Италиядаги фавқулотда ва мухтор элчиси Отабек Акбаров, италиялик ҳамкор Роберто Туччи, Energy Systemс компанияси президенти, «Милан» клуби ҳамкорлик бўйича директори Мауро Тавола, «Милан»нинг афсонавий ҳужумчиси, ҳозирда жамоа менежери Даниэле Массаро, «Милан»нинг собиқ футболчиси Кристиан Заккардо иштирок этди.
Тадбир бошида ЎФА биринчи вице-президенти Равшан Эрматов сўз олиб, ушбу учрашув Ўзбекистон шарафини муносиб ҳимоя қилиб келган футболчиларнинг миллий терма жамоа билан хайрлашув ўйини бўлишини таъкидлаб ўтди. Шунингдек, бу Эрматовнинг ҳакамликдаги хайрлашув ўйини бўлиши таъкидланди.
Шундан сўнг BMB Trade Group компанияси Кузатув кенгаши раиси Бекзод Маматқулов Италия А Серияси афсоналарини таклиф қилиш ғояси қандай пайдо бўлгани, музокаралар олиб бориш жараёни ҳақида сўзлади.
Анжуманда Ўзбекистон терма жамоаси ва А Серия рамзий терма жамоасининг қайдномаси эълон қилинди:
Ўзбекистон футболи афсоналари: Павел Бугало, Игнатий Нестеров, Бахтиёр Ашурматов, Виталий Денисов, Анзур Исмоилов, Шавкат Муллажонов, Акмал Шораҳмедов, Асқар Жадигеров, Ислом Иномов, Асрор Алиқулов, Одил Аҳмедов, Сервер Жепаров, Темур Кападзе, Санжар Турсунов, Азиз Ҳайдаров, Жасур Ҳасанов, Элдор Магдеев, Александр Гейнрих, Бекзод Маматқулов, Шуҳрат Мирхолдиршоев, Носир Отақўзиев, Анвар Солиев, Неъматилло Қутибоев.
Италия футболи афсоналари: Кристиан Аббиати, Дарио Шимич, Лука Антонини, Кристиан Заккардо, Кристиан Зенони, Эдуардо, Алдаир, Венсан Кандела, Луижи ди Бяджо, Анжело Карбоне, Марек Янкуловский, Сержиньо, Людовик Жюли, Робсон Толедо, Альберто Жилардинё, Даниэле Массаро, Винченцо Яквинта.
Эслатиб ўтамиз, Италия ва Ўзбекистон футболи афсоналари ўртасида ўртоқлик учрашуви 18 май куни «Пахтакор» стадионида бўлиб ўтиши белгиланган. 17 май куни эса «Бунёдкор» стадионида медиа-тадбирлар ўтказилади.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)