O‘zbekiston futbol assotsiatsiyasi tomonidan 6-may, juma kuni O‘FA majlislar zalida Italiya chempionati va O‘zbekiston futboli afsonalari o‘rtasida o‘tkaziladigan o‘rtoqlik uchrashuviga bag‘ishlangan matbuot anjumani bo‘lib o‘tdi. Bu haqida “Daryo” muxbiri xabar bermoqda.
Anjumanda O‘FA birinchi vitse-prezidenti Ravshan Ermatov, BMB Trade Group kompaniyasi Kuzatuv kengashi raisi Bekzod Mamatqulov va O‘zbekiston Milliy media assotsiatsiyasi boshqaruv raisi Sherzodxon Qudratxo‘ja va boshqalar ishtirok etdi.
Shuningdek, tadbirda onlayn-formatda Italiyadan O‘zbekistonning Italiyadagi favqulotda va muxtor elchisi Otabek Akbarov, italiyalik hamkor Roberto Tuchchi, Energy Systems kompaniyasi prezidenti, “Milan” klubi hamkorlik bo‘yicha direktori Mauro Tavola, “Milan”ning afsonaviy hujumchisi, hozirda jamoa menejeri Daniele Massaro, “Milan”ning sobiq futbolchisi Kristian Zakkardo ishtirok etdi.
Tadbir boshida O‘FA birinchi vitse-prezidenti Ravshan Ermatov so‘z olib, ushbu uchrashuv O‘zbekiston sharafini munosib himoya qilib kelgan futbolchilarning milliy terma jamoa bilan xayrlashuv o‘yini bo‘lishini ta’kidlab o‘tdi. Shuningdek, bu Ermatovning hakamlikdagi xayrlashuv o‘yini bo‘lishi ta’kidlandi.
Shundan so‘ng BMB Trade Group kompaniyasi Kuzatuv kengashi raisi Bekzod Mamatqulov Italiya A Seriyasi afsonalarini taklif qilish g‘oyasi qanday paydo bo‘lgani, muzokaralar olib borish jarayoni haqida so‘zladi.
Anjumanda O‘zbekiston terma jamoasi va A Seriya ramziy terma jamoasining qaydnomasi e’lon qilindi:
O‘zbekiston futboli afsonalari: Pavel Bugalo, Ignatiy Nesterov, Baxtiyor Ashurmatov, Vitaliy Denisov, Anzur Ismoilov, Shavkat Mullajonov, Akmal Shorahmedov, Asqar Jadigerov, Islom Inomov, Asror Aliqulov, Odil Ahmedov, Server Jeparov, Temur Kapadze, Sanjar Tursunov, Aziz Haydarov, Jasur Hasanov, Eldor Magdeyev, Aleksandr Geynrix, Bekzod Mamatqulov, Shuhrat Mirxoldirshoyev, Nosir Otaqo‘ziyev, Anvar Soliyev, Ne’matillo Qutiboyev.
Italiya futboli afsonalari: Kristian Abbiati, Dario Shimich, Luka Antonini, Kristian Zakkardo, Kristian Zenoni, Eduardo, Aldair, Vensan Kandela, Luiji di Byadjo, Anjelo Karbone, Marek Yankulovskiy, Serjinyo, Lyudovik Jyuli, Robson Toledo, Alberto Jilardinyo, Daniele Massaro, Vinchenso Yakvinta.
Eslatib o‘tamiz, Italiya va O‘zbekiston futboli afsonalari o‘rtasida o‘rtoqlik uchrashuvi 18-may kuni “Paxtakor” stadionida bo‘lib o‘tishi belgilangan. 17-may kuni esa “Bunyodkor” stadionida media-tadbirlar o‘tkaziladi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)