O‘zbekistondan may oyining dastlabki to‘rt kuni davomida 350—400 tonnaga yaqin gilos tashqi bozorlarga jo‘natildi, deb xabar beradi EastFruit.
Ma’lum qilinishicha, 2022-yilning aprel oyi oxiri – may oyi boshlarida mamlakatda “Bahor” navli gilos pishib yetilgan va shu vaqtdan boshlab, yangi hosil gilosini tashqi bozorlarga jo‘natish mavsumi ham boshlangan.
O‘zbekiston eksport kompaniyalaridan birining rahbari, Farg‘onadagi “Rizq Agro Grup” mas’uliyati cheklangan jamiyati direktori Shahboz O‘rinboyevning aytishicha, ayni paytda 20 dan 26 millimetrgacha kalibrli gilos eksportga yo‘naltirilmoqda. Mahsulot sifati va qadoq turiga qarab, 26 millimetrga yaqinroq kalibrli gilosni eksportga jo‘natish narxlari (qadoqlash va mahsulotga ishlov berish xarajatlari hisobga olinsa) 50—70 ming so‘m/kilogramm oralig‘ida bo‘lib turibdi.
Eslatib o‘tamiz, O‘zbekiston jahon bozorida gilosning eng yirik eksportyorlaridan biri bo‘lib, 2021-yili ushbu mahsulot eksporti bo‘yicha jahonda 5-o‘rinni egallagan edi. 2021-yilning qish fasli va erta bahorda kuzatilgan ob-havo anomaliyalari danakli mevalar hosiliga yaxshigina zarar yetkazganiga qaramay, gilos 2021-yilda O‘zbekiston eksportini keskin oshirgan yagona danakli meva mahsuloti bo‘lgan. Jismoniy jihatdan eksport 2020-yildagi 29,3 ming tonnaga (56,4 million dollar) nisbatan 60,1 ming tonna (83,1 million dollar)ga, ya’ni, ikki barobar o‘sgan. Bu O‘zbekistonning gilos eksporti bo‘yicha tarixdagi rekord ko‘rsatkichdir.
Izoh (0)