Ғарбнинг Украинага юбораётган разведка маълумотлари Россиянинг махсус операциядаги мақсадларига эришишига тўсқинлик қилмайди, деди Кремль матбуот котиби Дмитрий Песков журналистларга.
Аввалроқ The New York Times (NYT) Қўшма Штатлар Украинага разведка маълумотларини узатаётгани, Киев ушбу маълумотлар ёрдамида Россия ҳарбийларига зарба бергани ҳақида хабар берганди. Шу муносабат билан Песковдан Москва мазкур маълумотларни ишончли деб ҳисоблаш-ҳисобламаслиги ҳақида сўралган.
Песков Россия ҳарбийлари «АҚШ, Буюк Британия ва НАТО аъзоларининг доимий равишда Украина Қуролли Кучларига разведка маълумотлари ва бошқа кўрсаткичларни етказиб беришини яхши билади» деб жавоб берди. «Ушбу давлатлар ва иттифоқчилар Украинага қуроллар оқимини юбораётгани билан бирга, буларнинг барчаси операцияни тез якунлашга ёрдам бермайдиган, лекин махсус ҳарбий операция давомида белгиланган мақсадларга эришишга ҳам тўсқинлик қила олмайдиган ҳаракатлардир».
Пентагон вакили Жон Кирби Украинага разведка маълумотлари берилаётгани тўғрисидаги маълумотларнинг тафсилотлари ҳақида гапиришдан бош тортди. Шу билан бирга, у АҚШ Украина томонига «улар ўзини ҳимоя қилиш учун фойдаланиши мумкин бўлган» маълумотларни узатаётганини айтди. Апрель ойи бошида Кирби Киев бу маълумотлардан «қарши ҳужум бошлаш» учун фойдаланиши мумкинлигини тан олганди.
Аввалроқ Буюк Британия Қуролли Кучлари вазири Жеймс Хиппи «Украина тупроғида ўлим ва қон тўкилишига бевосита ҳисса қўшадиган таъминот занжирларини узиш» мақсадида Украинанинг Россия ҳудудидаги нишонларга зарба беришини «мутлақо қонуний» деб атаган эди.
Изоҳ (0)