Ижтимоий тармоқларда Жиззах вилоятининг Мирзачўл тумани Гагарин шаҳарчасида йўловчи талашган таксичилар ўртасида жанжал юзага келгани, улардан бири иккинчисини машинасининг капотида судраб кетгани тасвирланган видео тарқалди. Ҳолат бўйича вилоят ИИБ Жамоат хавфсизлиги хизмати ЙҲХБ томонидан суриштирув ишлари олиб борилган.
Аниқланишича, бир нечта ҳайдовчилар йўловчи ташиш фаолияти билан шуғулланиш учун махсус лицензияга эга бўлмай туриб, йўловчи (мижоз) талашган ва ўртада низоли ҳолат юзага келган. Оқибатда Lacetti ҳайдовчиси ўзга бир шахснинг ҳаётига хавф солувчи ҳамда йўл-транспорт ҳодисасини келтириб чиқариши мумкин бўлган ҳаракатни амалга оширган.
Ҳолат юзасидан Lacetti ҳайдовчисига нисбатан Маъмурий жавобгарлик тўғрисидаги кодекснинг 128-моддаси (ҳайдовчиларнинг транспорт воситаларини пиёдалар йўлкаларидан юргизиши, йўл белгилари ва йўл ҳаракатининг бошқа қоидалари талабларига риоя этмаслиги) билан маъмурий баённома расмийлаштирилган. Шунингдек, тортишувнинг бошқа иштирокчиларига нисбатан ҳудудий профилактика инспекторлари томонидан қонунда белгиланган тартибда чоралар кўрилмоқда.
Бундан олдин Сурхондарёда ЙПХ ходимини Lacetti капотида судраб кетган ҳайдовчи қамоққа олингани, Самарқандда ЙПХ инспекторининг тўхташ ишорасига бўйсунмаган Damas ҳайдовчиси ушлангани тўғрисида хабар берилганди.
Изоҳ (0)