Андижон вилояти ҳокими Шуҳрат Абдураҳмонов раислигида 2022 йилнинг 25 апрель куни ўтказилган ҳокимлик соатида вилоятда «Андижон полкаси» ойлиги ўтказилиши лозимлиги ҳақида топшириқ берилганди. Унда ҳоким ўзини ҳақиқий андижонликман деб билганлар жамоаси, ҳамкасблари билан ҳар куни «Андижон полкаси»га рақсга тушишни одат тусига айлантириши кераклигини буюрганди. Шундан сўнг ижтимоий тармоқларда рақсга тушаётган фуқароларнинг видеолавҳалари тарқалди. Маданият вазири Озодбек Назарбеков ҳам бу ташаббусни қўллаб-қувватлашини айтди. Сенатнинг Мудофаа ва хавфсизлик масалалари қўмитаси раиси ўринбосари Толибжон Мадумаров ҳам ҳаракат тўғри ташкил этилганини билдирди.
«Дарё» мухбири андижонликлар билан суҳбатлашиб, аҳолининг бу борадаги фикри билан қизиқди.
Сўровномада иштирок этганларнинг деярли кўпчилиги азалдан «Андижон полкаси»га ўйнаб келинганлигини, яхши ташаббус эканлигини, буни янада оммалаштириш зарурлигини айтди.
«Ёшлигимизда роса ўйнардик. Ҳозир қариб, ўйнолмаяпмиз. Ёшлар орасида буни ривожлантиришимиз керак», — дейди отахонлардан бири.
Банкда навбат кутиб турган онахон эса «Ўйинга тушиш кони фойда. Мисол учун, юраги оғрийдиган одам учта мусиқага ўйинга тушса, янаям яхши бўлади, дейишади. Мен, масалан, уйда доим ўйнайман», деган бўлса, қолганлари эса «Мактаб давримда ‘Андижон полкаси’га ўйнаб мусобақаларда ютганман», дейди. Яна бири эса «Ҳақиқатанам фойдали. Бизга ўхшаган дўмбоқлар озади. Шунинг учун бунақа тадбирларни кўпроқ қилсин», деган фикрларни билдирган.
Мазкур ташаббусни ҳайдовчилар ҳам қўллаб-қувватлаган.
«Одамларни тушириб, ҳозир автобусдаги мусиқани ўчирдик. Аммо ‘Андижон полкаси’ йўқ. Fleshka’га ёзиб қўйишим керак экан. Ҳамма ўйнаб юргани яхши-да», — дейди вилоят марказидан туманларга қатновчи автобус ҳайдовчиларидан бири.
«‘Андижон полкаси’нинг уч-тўрт хил вариантини қўйиб юрибмиз. Шу орқали одамларга яхши кайфият улашиш мақсадимиз», — дейди яна бир ҳайдовчи.
Ёшларнинг фикри билан қизиққанимизда «Оммалаштириш яхши бўлса керак. Кўпроқ тарғиб қилинади. Лекин туман ҳокимларининг, кап-катта одамларнинг ўйнаши сал ғалатироқми, ёшларга бўлаверади», — дейди йўловчи ёш йигит.
«Ўйинга тушиш эскидан урф-одат бўлиб келган-ку. Шунинг учун шарт бўлса керак. Ўзимиз ҳам анча-мунча тадбирларда ўйнаб турамиз», — дейди талабалардан бири.