Давлат хавфсизлик хизмати Самарқанд вилояти бошқармаси ҳамда вилоят божхона бошқармаси ходимлари Ўзбекистон ҳудудидан нақд кўринишдаги хорижий валютани ноқонуний олиб чиқиб кетилишининг олдини олди, деб хабар беради ЎзА.
Маълум қилинишича, Самарқанд туманида яшовчи 32 ёшли Х.С. «Самарқанд» халқаро аэропорти орқали декларацияда кўрсатилмаган 1,5 миллион рублни (жами 235,5 миллион сўм) олиб чиқишга урингани аниқланиб, тегишли тартибда ҳужжатлаштирилган ва экспертизага юборилган.
Ҳозирда ушбу шахсга нисбатан Жиноят кодексининг тегишли моддалари билан жиноят иши қўзғатилиб, суриштирув ҳаракатлари олиб борилмоқда.
Маълумот учун, қонунчиликка кўра 100 миллион сўмгача эквивалентдаги нақд хорижий валютани Ўзбекистон ҳеч қандай рухсатномасиз олиб чиқиш мумкин. Шунингдек, 70 миллион сўмгача бўлган эквивалентдаги маблағлар учун декларация талаб қилинмайди.
Аввалроқ Тошкент халқаро аэропортида 286 минг доллардан ортиқ пулни норин, кабоб, пахлава каби егуликлар орасига яшириб, божхонадан олиб ўтилишининг олди олингани ҳақида хабар берилган эди.