4 май куни Жиззах вилояти Зомин туманининг тоғли ҳудудларида кузатилган кучли ёғингарчилик натижасида туманнинг Пешағор, Аччи, Қанғли ва Шўрча қишлоқларидан ўтган сойларда сел сувлари оқими кузатилгани тўғрисида хабар берилганди. Вилоят ИИБнинг маълум қилишича, мазкур сел оқими йўлида қолиб кетган икки фуқаро қутқарилган.
Маълум қилинишича, кучли ёғингарчилик оқибатида сел сувлари Жиззах—Зомин автомобиль йўли остида ўрнатилган қувурларга сиғмасдан ушбу йўлнинг 25, 26, 27-километрлари устидан тошиб ўтган. Мазкур сел оқими йўлида икки нафар фуқаро қолиб кетган ва улар ички ишлар органлари ходимлари томонидан қутқарилган. Таъкидланишича, ҳозирда уларнинг аҳволи яхши.
Сел оқибатларини бартараф этишда вилоят фавқулодда вазиятлар бошқармасининг 140 нафар қутқарувчиси ва 8 та махсус техникаси, шунингдек, фавқулодда вазиятларнинг олдини олиш ва бундай вазиятларда ҳаракат қилиш давлат қуйи тизимига кирувчи ташкилотларнинг 83 нафар шахсий таркиби ва 25 та махсус техникаси жалб этилган. Ходимлар томонидан сел сувлари тошган кўчалар, аҳоли хонадонларида ўрганишлар олиб борилиб, сел қолдиқлари тозаланмоқда. Ҳозирда ҳовли ва ертўлаларда тўпланган сув махсус техникалар ёрдамида чиқарилмоқда. Ҳодиса оқибатида жабрланганлар йўқ.
Эслатиб ўтамиз, «Ўзгидромет» 3—4 майда Волгабўйи ҳудудларидан нам ва нисбатан салқин ҳаво массалари кириб келишини маълум қилганди. 3 май куни кучли ёғингарчилик сабаб Ўзбекистоннинг айрим ҳудудларида сел оқимлари ва тошқин сувлари юзага келди. Кечга бориб Зомин туманининг тоғли ҳудудларида кузатилган сел оқимлари тўхтади. Кучли ёғингарчиликлар туфайли Қамчиқ довони вақтинча ёпилди ва бир неча соат ўтгач қайта очилди.
Изоҳ (0)