Наманганда тамагирлик билан шуғулланиб келган жиноий гуруҳ аъзолари ушланди

Наманган шаҳрида ҳамкорликда олиб борилган тезкор тадбирлар давомида тамагирлик билан шуғулланиб келаётган гуруҳ қўлга олинди. Бу ҳақда Наманган вилояти ИИБ ахборот хизмати хабар берди.

Маълум қилинишича, Наманган шаҳридаги бир гуруҳ шахслар фоизга пул бериб келган. Пулни бериш аввалида фоизларни қандай ҳисобланиши ҳақида батафсил маълумот берилмагани сабаб, қарздорларнинг қарзи бир неча баробарга ошиб кетаверган. Масалан, аёллардан бири 600 доллар олган бўлса, 36 миллион сўм қарзга кириб кетган. Аёл улар билан қарзни 20 миллион сўмга ёпишга келишган. Ушбу пулларни қўлга киритган гуруҳ қолган маблағларни талаб қилишни давом этган. Охир-оқибат аёл ўз жонига қасд қилишга уринган.

Аниқланишича, уюшган гуруҳнинг тўрт нафар аъзосининг ҳар бири муқаддам судланган шахслар бўлиб, улар асосан телефон аппаратлари қарзга бериб, ўтган ҳар ҳафта учун қўшимча пул талаб қилган. Агар белгиланмаган пуллар ўз вақтида қайтарилмаса, ўлдириш билан қўрқитиб, руҳий тазйиқ ўтказиб, товламачилик қилиб келган.

Наманган вилояти ИИБ Жиноят-қидирув бошқармаси Уюшган жиноятчиликка қарши кураш бўлими, Наманган шаҳар ИИО ФМБ Одам савдосига қарши кураш бўлими ходимлари ҳамкорлигида ўтказилган тезкор тадбирда мазкур гуруҳ аъзолари қўлга олинган.

Ҳолат бўйича Тергов бўлими томонидан Жиноят кодексининг 165-моддаси (товламачилик) 2-қисми бўйича жиноят иши қўзғатилган.

Аввалроқ Самарқандда такси ҳайдовчилардан пул ундириб келган яна бир жиноий гуруҳ аъзолари қўлга олингани тўғрисида хабар берилганди.