Yevropa Ittifoqi Rossiya neftidan butunlay voz kechish majburiyatini oltinchi sanksiyalar paketiga kiritishni rejalashtirmoqda. Bu haqda Bloomberg manbalarga tayanib yozmoqda.
Taxminlarga ko‘ra, neft xaridini taqiqlash yil oxirida kuchga kiradi va unga qadar cheklovlar bosqichma-bosqich joriy etiladi.
Bundan tashqari, agentlik ma’lumotlariga ko‘ra, yangi sanksiyalar paketi doirasida yana bir qancha Rossiya banklari, jumladan, “Sber” ham SWIFT’dan uziladi. Yevropa Ittifoqi shuningdek, bulutli servislarning ishlashini va rossiyaliklarning ko‘chmas mulk sotib olishini cheklashi mumkin.
Oltinchi sanksiyalar paketi kelasi haftada Yevropa Ittifoqiga a’zo davlatlarning doimiy vakillari yig‘ilishidan so‘ng kelishib olinishi kutilmoqda.
Sanksiyalarning yangi paketi Rossiya neftidan voz kechishni o‘z ichiga olishi mumkinligi haqida 29-aprel kuni The New York Times ham manbalarga tayangan holda xabar bergandi. Avval Bryussel Rossiyadan ko‘mir olib kirilishiga embargo joriy qilgandi.
Yevropa Ittifoqi Rossiya neftining eng yirik importchisi hisoblanadi. 2019-yilda Yevropa Ittifoqi import qilgan xom neftning deyarli uchdan ikki qismi Rossiyadan olingan.
Avvalroq Avstriya Rossiya neftidan butunlay voz kechgan edi. Shuningdek, Germaniya 2022-yil oxirida Rossiyadan neft importini to‘liq to‘xtatishni maqsad qilgan.
Izoh (0)