13 апрель куни Тошкент шаҳар ҳокимиятида ўтказилган мажлисда Жаҳонгир Ортиқхўжаев масъулларга 10 кун муддатда Тошкентдаги асосий йўлларни таъмирлаш топшириғини берди. Бунинг учун бутун шаҳардаги хусусий ва давлат техникалари жалб қилиниши айтиб ўтилди.
Маълумот ўрнида айтганда, бугунги кунда Тошкент шаҳри бўйлаб жами 66 та марказий кўча мавжуд бўлиб, шулардан 22 та энг серқатнов, таъмирталаб кўчаларда асфальт ётқизиш ишлари олиб борилмоқда.
Бунинг учун Тошкент шаҳар ҳокимияти томонидан бир нечта пудратчилар танлаб олинган. «Дарё» ана шундай пудратчи ташкилотлардан бири — Grand Road Tashkent ҚК қурилиш ишлари бўйича директори билан олиб борилаётган ишлар ҳақида суҳбатлашди.
Тошкент шаҳридаги йўлларни қайта таъмирлаш учун кундуз кунига 2 та бригада ташкил қилганмиз. Уларга 15 га яқин махсус техника бириктирилган. Худди шундай бригада кечки сменада ҳам ишламоқда. Бунда энг асосий масала — тезлик. Қолаверса, сифатни унутмаган ҳолатда, — деди Grand Road Tashkent ҚК қурилиш ишлари директори Икром Ризақулов.
Тошкентда катта кичик чуқурларни ямаш ишлари аввал ҳам кўп бора амалга оширилган. Аммо ямалган жойлар қисқа вақт ичида яна чуқурга айланганини кўп кўрганмиз. Ҳозирда олиб борилаётган ишларга пудратчи ташкилот томонидан қанча муддат кафолат берилади?
Бизнинг ҳозирги қилаётган ишлармиз жорий таъмирлаш дейилади. Ўз номи билан жорий бўлганидан кейин уларга муддат берилмайди. Биз шунчаки чуқурни устига асфальт ташлаб ямаб кетаётганимиз йўқ. Аввалига ўша чуқурнинг атрофи фрейзер мосламасида кесиб олинади. Кейин у ер чанг, майда тошлардан тозаланади. Шундан сўнг битум қўйилади ва асфальт ётқизилади. Ана шу усулда аввалги қилган асфальтларимиз 2-3 йилдан бери сақланиб турибди. Ўйлайманки, ҳозирги ишларимизнинг ҳам муддати 2-3 йилдан кам бўлмайди. Балки, ундан ҳам кўпроқ бўлади, — деб изоҳ берди Икром Ризақулов.Тошкент шаҳар ҳокими 10 кун ичида пойтахт йўлларидаги барча чуқурлар ямалиши кераклигини айтиб ўтганди. Белгиланган муддат аллақачон якунланган. Шу вақт ичида барча кўчалардаги чуқурлар ямалди, қайта таъмирланди дейиш қийин. 10 кун ичида бундай катта ҳажмдаги ишни битириш амримаҳол. Лекин муҳими иш давом этмоқда.
Эслатиб ўтамиз, фуқаролар ҳам Тошкент шаҳри йўлларини ободонлаштириш ишларига ўз ҳиссаларини қўшишлари мумкин. Бунинг учун йўллардаги чуқурликларни суратга олиб, Халқ назорати электрон порталига юбориш керак бўлади.
Изоҳ (0)