Учта вилоят аҳолисининг даромади камайиб кетди. Йил бошидан бери ҳудудлар бўйича аҳоли даромадлари қандай бўлмоқда?

Ўзбекистонда ҳудудлар бўйича аҳоли жон бошига умумий даромадлар кўрсаткичлари маълум қилинди. 

2022 йилнинг январь—март ойларида аҳоли даромадларининг реал ўсиши 3,3 фоизни ташкил қилди. 

Ўсиш кўрсаткичи ўтган йилга нисбатан 2,3 фоизга пастроқ бўлди. 2021 йилнинг биринчи чорагида аҳоли жон бошига даромадларнинг реал ўсиши 105,6 фоиз бўлган эди.  

Йилнинг биринчи чорагида аҳоли жон бошига умумий даромадларнинг энг юқори реал ўсиши Навоий вилоятида қайд этилди — 10,2 фоиз. 

Фарғона вилоятида бу кўрсаткич 9,4 фоиз бўлди. Тошкентда аҳоли даромадлари йил бошидан бери 6,5 фоизга ўсган.

Қорақалпоғистон, Сурхондарё ва Бухоро вилоятларида йил бошидан бери аҳоли жин бошига реал даромадлар камайди. Қорақалпоғистонда бу даромадлар 0,3 фоизга камайган бўлса, Сурхондарё ҳамда Бухорода мос равишда 0,4 ва 0,6 фоизга пастлади.

Ҳудудлар бўйича аҳоли умумий даромадлари таркибида меҳнат фаолиятидан олинган даромадларнинг энг юқори улуши Тошкент (73,6 фоиз) вилоятида кузатилди. 

Бу турдаги даромадларга ёлланиб ишловчиларнинг иш ҳақи ва мустақил равишда банд бўлишдан олинган маблағлар киради.

Аввалроқ Ўзбекистонда 5 млн сўмдан кўп расмий ойлик оладиганлар сони маълум бўлгани ҳақида хабар берилган эди.