Moliya vazirligi O‘zbekistonda “oq” oyliklar (rasmiy ish haqi) miqdori bo‘yicha statistik ma’lumotlarni e’lon qildi.
Unga ko‘ra, 2021-yilda 4 685 900 nafar fuqaro o‘z oyligidan soliq to‘lagan. Ulardan 42,6 foizi – budjet, 57,4 foizi esa nobudjet tashkilotlar xodimlaridir.
Oyliklar kesimida o‘zbekistonliklarning ko‘pchiligi 1 million so‘mgacha bo‘lgan “oq” oylik oladi — 1 616 800 odam.
Ikkinchi o‘rinda 2 milliondan 4 milliongacha oylik oladiganlar — 1 157 400 nafar odam. 1 130 100 nafar kishi 1 milliondan 2 milliongacha ish haqi oladi.
5 million va undan ko‘proq ish haqi esa 513 200 nafar xodimga beriladi. 268 400 ta xodim 4 milliondan 5 milliongacha maosh olishi qayd etildi.
O‘sish bormi yoki yo‘q?
2021-yilda jismoniy shaxslar daromadidan kelib tushadigan soliqlar 18,9 trln so‘mni tashkil qilgan, o‘sish ko‘rsatkichi 3,8 trln so‘mni tashkil qiladi.
2020-yilning noyabr oyida ish haqidan soliq to‘laydiganlar soni 4 422 900 nafar bo‘lganini hisobga olsa, o‘sish 456 900 kishini tashkil qildi.
O‘sishning asosiy sabablari:
- iqtisodiy faollikning tiklanishi;
- budjet sektorida eng kam ish haqi miqdorining o‘rtacha 12,8 foizga oshishi;
- 2020-yilda vaqtincha to‘xtatib qo‘yilgan budjet tashkilotlarida moddiy rag‘batlantirish to‘lovlarining 2021-yil boshidan qisman tiklanishi;
- xususiy sektorda ishlovchilar soni va mehnatga haq to‘lash fondining legallashtirilishi.
Avvalroq O‘zbekistonda 2021-yilda o‘rtacha oylik ish haqi qancha bo‘lgani haqida xabar berilgandi.
