Silk Avia компанияси 1 октябрга қадар ташкил этилади — президент топшириғи

Шавкат Мирзиёев раислигида 26 апрель куни ўтказилган йиғилишда хорижий ва ички сайёҳларнинг авиақатновларга бўлган талабини қондириш бўйича қатор вазифалар белгилаб берилди. Бу ҳақда президент матбуот котиби хабар қилди.

Қайд этилишича, авиақатновларга бўлган талабни қондириш мақсадида:

• 1 июлдан «Зиёрат туризми» дастури доирасида хорижий авиакомпанияларга кўрсатиладиган хизматларга 50 фоизгача чегирмалар жорий қилинади;
• йил якунигача маҳаллий авиақатновлар сони ҳафтасига 48 тадан 60 тага, туташувчи қатновлар сони 4 тадан 6 тага етказилади;
• 1 октябрга қадар маҳаллий авиақатновларга мўлжалланган янги Silk Avia авиакомпанияси ташкил этилади;
• авиаташиш харажатларини камайтириш мақсадида 9 та самолёт тўлиқ эконом-классга ўтказилади (бунда тарифлар 20 фоизга арзонлашади).

Эслатиб ўтамиз, Транспорт вазирлиги ташаббуси билан Uzbekistan Airports АЖ Silk Avia минтақавий шўъба авиакомпаниясини ташкил этаётгани, янги авиаташувчи 2022 йилдан парвозларни бошлаши ҳақида хабар берилганди.

Uzbekistan Airports акциядорлик жамияти Бошқаруви раиси Раъно Жўраева биринчи Тошкент халқаро инвестиция форумида сўзга чиқиб, ташкил этилаётган Silk Avia минтақавий авиакомпаниясининг айрим тафсилотларини маълум қилган:

«Бу ерда минтақавий авиаташувлар йўқ ва уларни ривожлантириш керак. Биз ҳозирда 40 га яқин йўналишни очмоқчимиз. Бу ички туризм ривожига ҳам катта ҳисса қўшади.

Эътибор берсам, Самарқанд, Бухоро, Хива каби сайёҳлик йўналишларига ҳам инсонлар ё чипта йўқлиги, ёки қимматлиги сабаб поезд, автобус ёхуд таксида боришга мажбур. Мен ички йўналишлар бўйича статистик маълумотларни кўриб чиқдим – 2021 йилда биз миллионга яқин йўловчига хизмат кўрсатдик. Албатта, талаб катта. Аҳоли мамлакат бўйлаб ҳаракатланишда қийинчиликларга дуч келмоқда.

Шунинг учун биз ишларни жадал суръатларда олиб бормоқдамиз, умид қиламизки, кузгача самолётларни етказиб берамиз ва илк парвозларни амалга оширишни бошлаймиз».