O‘zbekiston Transport vazirligi tashabbusi bilan Uzbekistan Airports AJ Silk Avia mintaqaviy sho‘ba aviakompaniyasini tashkil etmoqda. Yangi aviatashuvchi 2022-yildan parvozlarni boshlashni rejalashtirmoqda. Bu haqda Uzbekistan Airports xabar qildi.

Foto: Uzbekistan Airports

Silk Avia aviakompaniyasi 2021-yilning sentabr oyida ro‘yxatga olingan. 14–18-noyabr kunlari Dubay shahrida bo‘lib o‘tgan Dubai Airshow-2021 doirasida Uzbekistan Airports va HAS Aviation GT MChJ o‘rtasida mintaqaviy aviakompaniya tashkil etish strategiyasini yaratish bo‘yicha shartnoma imzolangan.

Ta’kidlanishicha, mintaqaviy aviakompaniyaning tashkil etilishi O‘zbekistonda ishbilarmonlik faolligini rag‘batlantirish va ichki turizmni rivojlantirish uchun shart-sharoitlar yaratishda muhim ahamiyatga ega bo‘lib, bu o‘z navbatida aholining aviatsiya harakatchanligi koeffitsiyentining oshishiga ta’sir qiladi.

“Biz bozorda o‘zbekistonliklar uchun hamyonbop narxlarda ichki havo qatnovlarini ta’minlaydigan aviakompaniya yaratishni maqsad qilganmiz. Yaqin-yaqingacha O‘zbekiston shaharlarini bog‘lovchi to‘g‘ridan-to‘g‘ri reyslarning yo‘qligi katta muammo edi. Samarqanddan Xorazmga borish uchun yo‘lovchilar Toshkent orqali uchishlari kerak edi. Bizning vazifamiz ichki tashishni nafaqat point to hub (poytaxtdan hududlarga) tamoyili bo‘yicha, balki point to point (o‘zaro hududlar o‘rtasida) tamoyili bo‘yicha ham tashkil etishdir.

Rejalarda 40 tagacha marshrut ishlab chiqish va yo‘lovchilar sig‘imi 70 kishigacha bo‘lgan hududiy havo kemalarini xarid qilish ko‘zda tutilgan. Tariflar temiryo‘l tariflari bilan taqqoslanadi. Bu ichki turizm rivojiga, iste’molchi uchun aviachiptalarning yakuniy narxiga ijobiy ta’sir ko‘rsatadi”, — dedi Uzbekistan Airports aksiyadorlik jamiyati boshqaruvi raisi Ra’no Jo‘rayeva.

Qayd etilishicha, yangi aviakompaniya mintaqaviy aeroportlarni rivojlantirish uchun ham zarur. Shuning uchun birinchi bosqichda u Uzbekistan Airports boshqaruv kompaniyasi tomonidan yaratiladi. Kelgusida aviakompaniyani xususiy sektorga o‘tkazish rejalashtirilgan. Shuni ta’kidlash kerakki, Silk Avia o‘zini Uzbekistan Airways milliy aviakompaniyasiga raqobatchi sifatida ko‘rsatmaydi, balki ichki tashishlarni tashkil etishda hamkor sifatida ishlaydi.