Туркманистон президенти Сердар Бердимуҳамедов Рамазон ойининг 27-кунида нишонланадиган лайлатул қадр кечаси муносабати 514 нафар маҳкумни афв этди, деб хабар беради «Интерфакс».
Бу борадаги тегишли қарорни давлат раҳбари 22 апрель куни видеоалоқа режимида ўтказилган ҳукумат йиғилишида имзолаган.
Шу муносабат билан, Бердимуҳамедов Туркманистон мудофаа вазири, Давлат хавфсизлик кенгаши котиби, Туркманистон президенти ҳузуридаги фуқаролик ва афв этиш масалалари бўйича таклифлар тайёрлаш комиссияси раиси Бегенч Гундогдиевга ҳуқуқни муҳофаза қилувчи идоралар раҳбарлари билан биргаликда афв этилганларнинг қамоқдан озод этилиши ва яқин кунларда оиласи бағрида бўлиши учун зарур ишларни амалга оширишлари бўйича топшириқ берган.
Вилоятлар, туман ва шаҳарлар ҳокимларига афв этилганларни ишга жойлаштириш бўйича зарурий чоралар кўриш вазифаси топширилган.
Бердимуҳамедовнинг айтишича, «мунтазам равишда афв этиш актлари орқали чин кўнгилдан пушаймон бўлган инсонларга ўз жиноятини ҳалол меҳнат ва мамлакат тараққиётида фаол иштироки билан ювиш имконияти берилади».
Маълумот учун, Туркманистонда афв этиш акцияси 1999 йилдан буён амалга ошириб келинмоқда. Ҳозирда бундай қарорлар йилда уч-тўрт марта, турли давлат байрамлари аввалида қабул қилинади.
Аввалроқ Гурбангули Бердимуҳамедов Туркий давлатлар ташкилоти Оқсоқоллар кенгаши аъзосига айлангани тўғрисида хабар берилганди.
Изоҳ (0)