Labubu қўғирчоғининг яратувчиси — Хитойнинг Pop Mart компанияси 2025 йилнинг биринчи ярмида даромадларини 400 фоизга оширгани маълум бўлди. Бу ҳақда Reuters агентлиги хабар берди.
Манбага кўра, Pop Martнинг хунук-чиройли Labubu қўғирчоқларининг даромадлари ошишига компаниянинг юқори фойда маржасига эга хорижий бозорларига чиққани сабаб бўлган. Соф фойда 396,5 фоизга, даромад эса 204,4 фоизга ошиб, июль ойида эълон қилинган прогнозлардан ҳам юқори натижа кўрсатган.
Pop Mart акциялари йил бошидан буён 200 фоиздан ортиқ ўсган. Компания қўғирчоқ саноатидаги доимий гигантлар — Barbie ишлаб чиқарувчиси Mattel ва Hello Kitty бренди эгаси Санриодан ҳам қимматроққа баҳоланмоқда.
Қайд этилишича, Pop Mart ўйинчоқларини “blind box” усулида сотади. Яъни харидор ўйинчоқни очиб кўрмагунча, қути ичида қандай коллекция борлигини билмайди. Тишлари кўриниб жилмайган Labubu қўғирчоғининг муваффақиятида машҳур юлдуз мухлислари ҳам катта рол ўйнаган. Улар орасида Blackpink гуруҳининг аъзоси Лиза, қўшиқчи Рианна ва собиқ футболчи Девид Бекҳэм бор.
Pop Mart қўғирчоқларига талаб кундан-кунга ошиб бормоқда. Компания эса мижозларга ўз вақтида қўғирчоқларни етказиш учун ишлаб чиқаришни оширишга ваъда берган.
Компания бош директори Ван Нин ўтган ой Хитой давлат оммавий ахборот воситаларига берган интервьюсида Labubu сотувлари сентябрь ойидан бошлаб кунига 10 миллион донадан ошишини айтган.
Ҳозирда Pop Mart’нинг 571 та дўкони мавжуд бўлиб, улардан 40 таси жорий йилнинг биринчи ярмида очилган. Шунингдек, компания 18 та давлатда 2 597 та автоматлаштирилган робот-дўконларга эга.
Изоҳ (0)