Ўзбекистон аҳолисининг қарийб ярмида қўшимча даромадга эҳтиёж бор

Шавкат Мирзиёев раислигида 19 апрель куни маҳаллабай ишлаш тизими натижадорлигини ошириш ҳамда аҳоли бандлигини таъминлаш масалалари юзасидан видеоселектор йиғилиши бошланди. Бу ҳақда президент матбуот котиби хабар қилди.

Йиғилишда бош вазир ўринбосарлари, вилоят, туман ва шаҳар ҳокимлари 2 та энг муҳим масала бўйича ҳисобот беради:

• ҳоким ёрдамчилари 3 ойлик фаолиятининг дастлабки натижалари;
• аҳоли бандлигини таъминлаш бўйича биринчи чоракда амалга оширилган ишлар», – деди давлат раҳбари сўзининг аввалида.

Қайд этилишича, ҳоким ёрдамчилари уч ой давомида 35,3 миллион аҳоли яшайдиган 6 миллион 900 минг хонадонни тўлиқ хатловдан ўтказиб, уларни 4 та тоифага ажратган. Булар:

• 11 фоизи – кам даромадли;
• 47 фоизи – доимий даромади бўлгани билан қўшимча даромадга эҳтиёжи бор;
• 6 фоизи – ижтимоий ҳимояга муҳтож;
• 36 фоизи – иқтисодий аҳволи яхши, ўзига тўқ оилалар ҳисобланади.

Янги тизим орқали ҳар бир ҳоким, унинг иқтисод бўйича 1-ўринбосари ва ҳоким ёрдамчилари аҳолининг 64 фоизи билан манзилли ишлаши кераклигини билиб олган. Бу борада жойлардаги мутасадди раҳбарлар ва ҳоким ёрдамчилари биринчи ва иккинчи тоифадаги хонадонлар билан ишлаб, 3 ойда 736 минг нафар фуқаронинг бандлигини таъминлаган. Шунингдек, 54 минг нафар фуқароларни касб-ҳунар ва тадбиркорликка ўқитган.