Ижтимоий тармоқларда қулупнай сотувчи аёллар ИИБ биносига қамаб қўйилгани, уларнинг сотиш мақсадида кўчага олиб чиққан қулупнайлари олиб қўйилиб узоқ вақт сақлангани учун яроқсиз ҳолга келгани тасвирланган видео тарқалди. Тошкент вилояти ИИБ мазкур вазият назоратга олинганини хабар қилган бўлса, Ички ишлар вазирлиги ахборот хизмати қулупнай сотувчи аёллар йўлнинг қатнов қисмида, ҳаракат хавфсизлигига халал берганини билдирди.
«Пойтахт вилоятининг Юқори Чирчиқ туманида йўлнинг қатнов қисмида, ҳаракат хавфсизлигига халақит бериб қулупнай савдоси билан шуғулланаётган фуқароларнинг, жамоат хавфсизлигини таъминлаш мақсадида жалб этилган ички ишлар органлари ходимларига қаршилик кўрсатиб, жанжал уюштирганликлари акс этган видеолари тарқалмоқда.
Албатта, юзага келган хавф зудлик билан бартараф этилиб, жамоат хавфсизлиги таъминланган. Жамоат тартибини бузган барча иштирокчиларнинг шахси аниқланиб, улар билан суриштирув ишлари олиб борилмоқда.
Воқеа жойида, қасддан, ички ишлар органлари ходимларнинг қонуний талабларини бажармаслик, уларга қаршилик кўрсатиш каби чақириқлар қилган фуқаролар ҳам аниқланган.
Ҳолат юзасидан расмий муносабат тайёрланмоқда ва тез фурсатда эълон қилинади», — дейилади вазирлик ахборот хизмати раҳбари Шохруҳ Ғиёсовнинг Telegram каналида.
Вазирлик ахборот хизмати раҳбари мазкур воқеани изоҳлар экан, буни ҳодисаларни бўрттириш ва ички ишлар органлари ходимларини ёмонотлиқ қилиб кўрсатишга шайланган «жамоатчилик вакиллари»нинг иши дея баҳолайди.
«Бундай ҳодисаларни бўрттириш ва ички ишлар органлари ходимларини ёмонотлиқ қилиб кўрсатишга шайланган ‘жамоатчилик вакиллари’ фаоллашганини инобатга олиб, ҳақиқий жамоатчилик назорати субъектларидан йўл ёқаларидаги тартибсиз савдо-сотиқ билан боғлиқ муаммолар, улар ортидан келиб чиқаётган йўл-транспорт ҳодисалари ва ҳоказо масалаларга кўпроқ эътибор қаратишларини мақсадга мувофиқ деб ҳисоблаймиз», дейди у.
Мавзуга доир:
- Тошкентда бир гуруҳ ППХ ходимлари фуқарони куч билан хизмат машинасига ўтқазишга уринаётгани акс этган видео бўйича расмий маълумот берилди
- Сирдарёдаги кафелардан бирида маст ҳолда жанжал кўтарган аёллар жазога тортилди
- Чироқчида ИИО ходимлари талабига бўйсунмай, улар устига ҳайдаб, қочиб кетган ҳайдовчига жиноят иши қўзғатилди
Изоҳ (0)