Тошкент шаҳридаги «Халқлар дўстлиги» майдонидаги чорраҳа ўтказувчанлиги ва пиёдалар хавфсизлиги янада оширилади, деб хабар бермоқда шаҳар ҳокимлиги.
Қайд этилишича, машиналарнинг юқори ўтказувчанлигини ва пиёдалар хавфсизлигини таъминлаш йўналишида «Халқлар дўстлиги» майдони олдидаги чорраҳада ҳам таъмирлаш ишлари бошланган. Бунда йўл автомобиллар ҳаракатланиши учун ёпилмаган ҳолда чорраҳанинг машиналарни ўтказувчанлиги ҳозиргидан кўра 70 фоизга оширилиши режалаштирилган.
«Таъмирлаш жараёни кун-у тун олиб борилаётган бўлиб, тез орада ишлар якунланиб, ҳайдовчи ва пиёдалар янги, замонавий чорраҳадан фойдаланишлари мумкин бўлади. Ноқулайликлар учун узр сўраймиз», — дейилади хабарда.
Аввалроқ кўприк қурилиши сабаб Тошкентдаги ТҲАЙ кўчасининг айрим йўналишларида ҳаракат вақтинча чекланиши хабар қилинганди. Шунингдек, Тошкент шаҳар ҳокими Жаҳонгир Ортиқхўжаев масъулларга 10 кун муддатда Тошкентдаги асосий йўлларни таъмирлаш топшириғини берганди. «Керак бўлса, кечқурун ишлайсизлар. 10 кундан ошиб кетса, кечирилмайди. Хато қилишга ҳаққинглар йўқ», — деган шаҳар ҳокими.
Эслатиб ўтамиз, Тошкент шаҳрида Рамазон ойи кечаларидаги таровиҳ намози муносабати билан ҳар куни 18:00 дан 00:00 га қадар масжидлар яқинидаги йўллар транспорт воситалари ҳаракати учун беркитилади.
Изоҳ (0)