Россия пойтахтидаги ўзбекистонлик меҳнат мигрантлари ишлаётган бино томи қулаб тушиши оқибатида бир киши ҳалок бўлди. Бу ҳақда Ташқи меҳнат миграцияси агентлиги хабар берди.
Маълум қилинишича, Москва шаҳридаги Бригадирск кўчасидаги бинолардан бирида олиб борилаётган таъмирлаш ишлари вақтида бино томи қулаб тушди.
Ташқи меҳнат миграцияси агентлигининг Москва шаҳридаги ваколатхонаси томонидан ўрганишлар натижасида маълум бўлишича, таъмирлаш ишларида ўзбекистонлик меҳнат мигрантлари бўлган.
Ҳодиса оқибатида бир нафар ўзбекистонлик Э.Н. ҳалок бўлган ва бир нафар фуқаро — М.Х. ҳозирда шифохонага ётқизилган.
Ҳозирги вақтда вафот этган Ўзбекистон фуқаросининг жасадини ватанга қайтариш чоралари кўрилмоқда.
Эслатиб ўтамиз, 2020 йилнинг декабрида Қозондаги қурилишда 37 ёшли ўзбекистонлик ҳалок бўлган, 2021 йилнинг мартида Санкт-Петербургда новвой бўлиб ишга жойлашмоқчи бўлган ўзбекистонлик эркак вафот этган, ноябрда Россияда оғир тан жароҳати олган ва касалликка чалинган икки фуқаро Ўзбекистонга қайтарилган эди.
Изоҳ (0)