8 апрель куни Тошкент шаҳридаги мажбурий даволаш наркология шифохонаси ходимлари мажбурий тартибда ер ағдариш ишларига жалб қилингани тўғрисида хабар берилганди. Меҳнат вазирлиги ҳолат бўйича ўрганиш ишлари ўтказилганини маълум қилди.
Ижтимоий тармоқларда тарқалган видеода ер ағдараётгани кўринган тиббиёт ходимларидан бири раҳбарияти топшириғидан норози бўлиб, «бош ҳамшира ва катта ҳамширанинг ер ағдариш ишларига жалб қилинганини ҳеч қаерда кўрмаганман», деса, бошқаси «ҳудуд жудаям катта — саккиз гектар, эплаб бўлмаяпти экан, шу сабаб биз ҳам бу ишга жалб қилинганмиз», деган.
Ҳолат юзасидан Тошкент шаҳар Бандлик бош бошқармасининг Давлат меҳнат инспекцияси томонидан ўрганиш ўтказилган.
Ўрганишда шифохона хўжалик ишлари мудири томонидан ходимлар муассаса ҳудудида ўз хизмат вазифаларига кирмайдиган ишларни бажаришни талаб қилингани сабабли Маъмурий жавобгарлик тўғрисидаги кодексининг 51-моддаси (меҳнатга маъмурий тарзда мажбурлаш) 1-қисми билан маъмурий жавобгарликка тортилган.
Аввалроқ Қашқадарёда тиббиёт ходимлари шифохона ҳудудини тозалашга жалб қилингани, Навоийда боғча тарбиячилари кўп қаватли уйларнинг подъездларини ювишга жалб қилингани аниқлангани тўғрисида хабар берилганди.
Изоҳ (0)