«Барселона» ўз майдонида «Айнтрахт»га 2:3 ҳисобида мағлуб бўлди ва Европа Лигасини тарк этди.
Шу тариқа каталонларнинг барча мусобақалар доирасидаги 15 ўйинлик мағлубиятсиз сериясига якун ясалди.
Хави шогирдлари сўнгги бор 20 январь куни Испания Кубоги доирасида «Атлетик Б»га қарши ўйинда (2:3) мағлубиятга учраганди. Шундан буён жамоа 11 та ғалаба ва 4 та дуранг натижа қайд этган.
«Кўк-анорранглилар» «Камп Ноу»да ўтказилган Еврокубоклардаги сўнгги 8 ўйиннинг 4 тасида имкониятни бой берди. 2020 йилдан буён «Барселона» ўз майдонида «Ювентус»га (0:3), «ПСЖ»га (1:4), «Бавария»га (0:3) ва «Айнтрахт»га (2:3) мағлуб бўлди.
Шунингдек, бу вақт мобайнида «Камп Ноу»да «Бенфика» (0:0), «Наполи» (1:1) ва «Галатасарой»га (0:0) қарши ўйинларда 3 та дуранг натижа қайд этилган. «Барселона» фақатгина Киевнинг «Динамо»си устидан ғалабага эриша олди.
Сўнгги икки ўйинда каталонияликлар дарвозаси томон 4 та пенальти белгиланди. «Айнтрахт»га қарши ўйинда Эрик Гарсиянинг қўполлигидан кейин 11 метрлик нуқта кўрсатилган бўлса, «Леванте»га қарши Ла Лиганинг 31-турида Эрик Гарсия, Дани Алвес ва Клеман Лангленинг хатолари эвазига «Барселона» дарвозаси томон 3 та пенальти белгиланганди. Тер Штеген улардан биттасини қайтаришга муваффақ бўлди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)