“Barselona” o‘z maydonida “Ayntraxt”ga 2:3 hisobida mag‘lub bo‘ldi va Yevropa Ligasini tark etdi.
Shu tariqa katalonlarning barcha musobaqalar doirasidagi 15 o‘yinlik mag‘lubiyatsiz seriyasiga yakun yasaldi.
Xavi shogirdlari so‘nggi bor 20-yanvar kuni Ispaniya Kubogi doirasida “Atletik B”ga qarshi o‘yinda (2:3) mag‘lubiyatga uchragandi. Shundan buyon jamoa 11 ta g‘alaba va 4 ta durang natija qayd etgan.
“Ko‘k-anorranglilar” “Kamp Nou”da o‘tkazilgan Yevrokuboklardagi so‘nggi 8 o‘yinning 4 tasida imkoniyatni boy berdi. 2020-yildan buyon “Barselona” o‘z maydonida “Yuventus”ga (0:3), “PSJ”ga (1:4), “Bavariya”ga (0:3) va “Ayntraxt”ga (2:3) mag‘lub bo‘ldi.
Shuningdek, bu vaqt mobaynida “Kamp Nou”da “Benfika” (0:0), “Napoli” (1:1) va “Galatasaroy”ga (0:0) qarshi o‘yinlarda 3 ta durang natija qayd etilgan. “Barselona” faqatgina Kiyevning “Dinamo”si ustidan g‘alabaga erisha oldi.
So‘nggi ikki o‘yinda kataloniyaliklar darvozasi tomon 4 ta penalti belgilandi. “Ayntraxt”ga qarshi o‘yinda Erik Garsiyaning qo‘polligidan keyin 11 metrlik nuqta ko‘rsatilgan bo‘lsa, “Levante”ga qarshi La Liganing 31-turida Erik Garsiya, Dani Alves va Kleman Langlening xatolari evaziga “Barselona” darvozasi tomon 3 ta penalti belgilangandi. Ter Shtegen ulardan bittasini qaytarishga muvaffaq bo‘ldi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)