Самарқандда туман электр таъминоти корхонаси раҳбари истеъмолчи томонидан пичоқлангани тўғрисида хабар берилганди. «Ҳудудий электр тармоқлари» АЖ мазкур ҳолатга муносабат билдирди.
Маълум қилинишича, Каттақўрғон туманида фаолият юритувчи «Зарина файз келажаги» МЧЖ корхонаси электр энергиясидан 57 миллион сўмлик муддати ўтган қарздорлиги учун туман электр таъминоти корхонаси масъуллари томонидан ўчирилган.
Шундан сўнг МЧЖ раҳбари Қорадарё электр таъминоти корхонаси раҳбари Пирхон Назаровдан электр энергиясидан қарздорлиги мавжуд бўлса-да, тармоққа қайта улаб беришни талаб қилган. Корхона раҳбари ўз навбатида қарздорлик тўлиқ бартараф этилгач, истеъмолчи тармоққа қайта уланишини маълум қилган.
Корхона раҳбарининг асосли талабини бажаришни истамаган МЧЖ раҳбари келишмовчилик давомида ўзи билан ёнида олиб кирган пичоқ билан ўқталиб, туман электр таъминоти корхонаси раҳбарининг бўйин қисмига жароҳат етказган.
Ҳозирда туман электр таъминоти корхонаси раҳбари шифохонага жойлаштирилган ва шифокорлар назоратида. Аҳволи қониқарли. Ўтказилган таҳлиллар натижасида унинг чап томонлама бўйин олд ён соҳасида кесилган жароҳат борлиги аниқланган.
Айбланувчига нисбатан Жиноят кодексининг тегишли бандлари асосида иш қўзғатилган ҳамда процессуал тартибда ушланиб, қамоққа олинган.
Таъкидланишича, 2022 йилнинг 1 апрель кунидан бошлаб Самарқанд вилоятида «Ҳудудий электр тармоқлари» АЖ томонидан ташкил этилган ишчи гуруҳи томонидан жойларда электр энергиясидан катта миқдорда қарздор бўлган ҳамда турли хил йўллар билан тармоққа ноқонуний уланиб олган тадбиркорлик субъектлари ва аҳоли хонадонларини аниқлаш, тегишли тартибда қонунбузарлик учун жаримага тортиш юзасидан чора-тадбирлар олиб борилмоқда. Хусусан, 13 кун мобайнида ишчи гуруҳи томонидан вилоятда 130 дан ортиқ истеъмолчи электр энергиясидан ўғринча фойдаланаётгани аниқланиб, улар томонидан етказилган 1334,8 минг киловатт/соат электр энергияси ёки 400,4 миллион сўм қайта ҳисобланган.
Изоҳ (0)